[CRONICA BARTOSSII DE DRAHONICZ]

Anno domini MCCCXIX dominica post s. Jacobi proiecti sunt et interfecti Nicolaus iudex et magister civium et iurati Nove civitatis Pragensis de pretorio per Zizkam et suos complices.

Rex Wenceslaus obiit. Anno dom. MCCCCXIX feria IV post Assumcionem Marie obiit serenissimus et dominus, dominus Wenceslaus, Romanorum et Boemie rex, hora vesperarum in Novo castro prope Cunraticz prope Pragam. Feria V in crastino Zizka cum suis complicibus ecclesias et monasteria Prage intrans ymagines fregit multas. Et eodem die monasterium Carthusiense per eosdem est efractum et in crastino feria VI concrematum.

Rex Sigismundus (se) posuit ante Pragam. Anno domini MCCCCXX circa festum sancti Johannis rex Sigismundus Ungarie posuit se in campis contra Pragam cum duobus marchionibus Misnensibus et tercio marchione de Durink et cum duce Austrie et cum ducibus Johanne, Ludvico, Przemkone, Johanne dicto Bieli et fratre suo et cum pluribus ducibus Slezie et cum Johanne, duce Bavarie, et aliis pluribus ducibus et comitibus, baronibus tam Boemie quam Ungarie et aliarum terrarum et provinciarum dominis.

Eodem anno dominico post s.Jacobi predictus rex Sigismundus coronatus est in regem Boemie in ecclesia Pragensi sancti Viti per dominum Conradum, tunc archiepiscopum Pragensem, in presencia baronum Boemie et marchionum, ducum et dominorum suprascriptorum.

Eodem anno feria V post Jacobi predictus rex, marchiones, duces, comites et barones de campis a Praga recesserunt et quedam gentes dicti regis castrum Pragense de mandato ipsius regis obsederunt et ibi se usque festum sancti Viti defenderunt viriliter Pragensibus.

Eodem anno feria VI circa festum sancti Egidii circumvallatum est castrum Wyssegradum et gentes regis predicti per cives Pragenses, ubi ipsos pixidibus et machinis lucrare conabantur.

Eodem anno feria VI ipso die Omnium sanctorum in ortu et post ortum solis predictus rex commisit bellum et intravit cum civibus Pragensibus, domino Boczcone, domino Crussina, domino Hinkone de Colstein et alliis ipsorum complicibus in campis (circa) Wissegradum iacentibus, ubi ex gentibus regis bene trecenti barones, milites et clientes et quidam dux Bosnensis sunt interfecti et de gentibus Pragensibus eciam nonnulli perierunt, sed tamen Pragenses in campis remanserunt. Et eodem die hora meridiei datum est castrum Wissegradense Pragensibus per nobilem Johannem de Bozkowicz et alios milites et clientes dicti regis propter esuriem.

Anno domini MCCCCXXI dominico ante Viti castrum Pragense per gentes predicti regis Pragensibus est condescensum per tractatus oportunos, quia ante dictum castrum Pragenses nonnulla tempora et gentes Conradi archiepiscopi predicti et domini Nicolai de Budina iacuerunt in obcircumvallacione.

Anno domini MCCCCXXI predicto a medio quadragesime usque festum Penthecostes fortalicium Tussen, Brodam Boemicalem, Kurzim, Coloniam, Montes Cutnas, Czaslaviam, Nymburkam, castrum Lichymburg et omnes civitates regine in districtu Grecensi et civitatem Mielnik, Veronam et Lithomierzicz per tractatus et lucraciones hostiles et conflictu acquisiverunt.

Anno domini MCCCCXI dominico ante Viti nonnulli domini, milites, clientes et gentes domini regis predicti circumvallati (per) Pragenses, dominum Conradum, archiepiscopum Pragensem, dominum Johannem de Budina mediantibus tractatibus de castro Pragense ad alia castra dicti domini regis equitavimus.

Anno domini MCCCCXXII circa festum s. Stanislai venit dux Sigismundus Litwanie cum Polonis bene cum septem milibus equorum Pragam ipsis ad iuvamen.

Eodem anno Pragenses cum gentibus dicti ducis feria IV ante Urbani castrum Carlstein circumvallaverunt et dure cum magnis pixidibus et quinque machinis per potenciam lucrare nitebantur, ubi quam plures ex Pragensibus et Polonis diversimode de castro sunt interfecti tunc domino Sdeslao dicto Tluxa de Burzenicz et per alios milites et clientes regis Sigismundi tunc in eodem castro degentibus et se defendentibus; et ibi usque ad dominicam proximam ante festum s. Martini Pragenses in acquirendo iacuerunt et treugis pacis inter se factis usque ad unum annum Pragenses de campis recesserunt Carlsstain.

Eodem anno dominus Hanussius de Colowrat circa festum Nativitatis b. Marie habens secum CIV equites Alssikonem capitaneum et Przibramenses eorum trecentos vicit in campis per conflictum et ultra XXX interfecit et CXXIV captivos ad castrum adduxit.

Eodem anno in vigilia Nativitatis domini predictus dux Sigismundus Litwanie cum suis gentibus de Praga recessit et successive ad domicilia (r)evenit.

Anno domini MCCCCXXIII Zizka cum suis Pragenses prope Grecz vicit circa Corporis Cristi.

Anno domini MCCCCXXIV Zizka cum suis et Johanne Bzdinka et complicibus Pragenses mediante conflictu vicit et ipsis multos currus cum pixidibus recepit; CCC et (ultra) hospites Pragenses interfecti; et factum est feria V ante Viti in illa sillaba Jul pri mi prope fortalicium Malessow retro Montes Cuthnas; et dicebatur a veridicis, quod ex utraque parte MCCCC sunt ibi in loco interfecti, inter quos ex parte Pragensium interfecti sunt strenui milites Turkowecz tenens Pragense vexillum in manibus, dominus Hlas, Wykerz iuvenis, Hlawacz de Destnycz et CCCXXVI hospites Pragenses preter advenas et mechanicos Pragenses.

Eodem anno feria V ipso die s. Petri et Pauli apostolorum predictus dux Sigismundus Lithwanie iterum Pragam venit habens CCCC equites.

Eodem anno circa festum sancti Spiritus Zizka cum suis complicibus, cum Johanne Bzdinka et aliis multa opida, villas inter Glatoviam usque circum Plznam concremavit et usque Kralowicz, quos insecuti sunt hostiliter nobiles domini Hanuss de Krassow dictus Kolowrat, dominus Johannes dictus Hanowecz et dominus Krussina de Sswamberk, dominus Wilhelmus de Swihow, Burian Czalta et alii tam equites quam pedites de districtu et civitate Plznensi et de Carlsstain et Podbrdii et insecuti sunt eum de Plzna usque medium miliare retro Kralowicz cupientes secum conflictum intrare, qui Zizka, ut dicebatur a veridicis, habuit CCCCC equites et VII milia peditum cum CCC curribus et fugit in Zacz, persecutores vero in Plznam revertentes in crastino versus Glatoviam processerunt, quia Zizkoni CCC viros ad iuvamen dederunt; et feria III post festum Spiritus sancti suburbium in Glatovia et aliquot villas et molendina circum Glatoviam in medio miliari concremaverunt.

Eodem anno circa festum sancti Procopii revenit dux Sigismundus Litwanie Pragam et Pragenses ipsum pro domino susceperant de facto, sed non iure.

Anno domini MCCCCXXIV feria V ipso die sancte Margarethe Johannes Brdinka et Podstawek et Hyhal cum ipsorum complicibus obsederunt montem Ostromecz supra Multaviam.

Anno domini MCCCCXXV Rohacz et Johannes Bzdinka, post mortem Zizkonis sui sequaces, et dominus Bohuslaus de Sswamberk circa festum et ante festum Pasce potenti manu ad Pragam venerunt et eam in nocte vi per muros et per scalas lucrare hostiliter conabantur, quos Pragenses cum scalis a muris reverserunt.

Deinde eadem septimana ad Slanam venerunt et XII diebus iacuerunt et XII die ipsam civitatem lucraverunt per potenciam, ubi multos nobiles, clientes et cives domini Hinkonis de Colstain captivarunt ad CC et paucos vivos dimiserunt, reliquos cum civitate concremaverunt, deinde mox in Rudnicz venerunt et non valentes castrum lucrare civitatem concremaverunt.

Deinde ipso anno die s. Sigismundi ad castra Zebrak et Tocznik venerunt equitum noningenti et peditum VII milia et per tres dies non valentes castra lucrare civitates Zebrak et Horzowicze concremaverunt; et dominus Hanusius de Kolowrat tunc castrum Zebrak tenuit.

Eodem anno sabbato ante festum Philippi et Jacobi Ottik Laut de Vlazowicz cum Olamiro, Gindrzisskone et quodam dicto Mislynsky cum centum viginti sociis suis castrum desolatum Nyzmburk obsedit et mox in crastino dominico Also de Holicz et Hanus de Kolowrat per sturm lucraverunt et dictos captivarunt et viginti eorum interfecerunt.

Deinde traxerunt inter castra idem Krassow et Libstain et non sperantes, se aliquod istorum castrorum lucrari, multas villas dominorum castrorum predictorum, domini Friderici et domini Hanussii de Colowrat, excremaverunt.

Deinde idem Bohuslaus de Sswamberk, Rohacz, Johannes Bzdina, Hertwik, cives de Grecz regine, de Zacz, de Glatovia, de Piska, de Sicca, de Domazlicz, tunc regis Sigismundi inimici, (venerunt) ad fortalicium Sswihow tunc domini Wilhelmi de Skala cum octo milibus peditum et mille et ultra equitum, cum tribus machinis et pixidibus magnis et ibi per quindecim dies iacentes fossata detraxerunt et fortalicium per tractatus acquisiverunt et centum triginta captivos in iopulis de fortalicio, sed pro captivis ire permiserunt.

Eodem anno feria II ante Corporis Cristi idem dominus Bohuslaus de Sswamberk, Johannes Bzdina, Johannes Zmrzlikonis filius et Petrus, Buzko Pilikonis de Smolotil venerunt ante fortalicium Oborzistie, cuius tunc erat dominus Henricus de Dorenstain dictus Kolman, natus vero in Krzikawa, et eundem ibidem circumvallaverunt cum quadraginta (peditibus) et X equtius et cum pixidibus, sagitabant ut caput lapidibus super fortalicium et ibi per tres dies iacentes ipsum fortalicium mediantibus tractatibus acquiseverunt, sic quod idem Henricus Colman se dedit cum aliis sociis in captivitatem super ipsorum gracia, qui ipsum sic suscipientes ipsum Henricum Kolman, Ulricum dictum Holeska, Sigismundum dictum Stezka de Sokolowicz, dictum Czrt cum aliis septem ligantes cremaverunt XI ipsos, reliquos vero in captivitate, videlicet Petrum Tazowecz, qui ante fortalicium in primo ipsorum adventu erat ex inproviso captivatus, cum aliis in fortalicio captivatis XLV in eorum detinent captivitate et fortalicium similiter excremaverunt in vigilia corporis Cristi cum XI suprascriptis.

Deinde eodem anno, videlicet MCCCCXXV processerunt hostiliter ad castrum Wozycze et ibi cum machinis et pixidibus magnis per quinque septimanas iacentes et tres dies ipsum castrum mediante tractatu, sic quod tantum duo capitanei se in eorum militarem darent captivitatem, lucraverunt, alios liberos dimiserunt et ipsum castrum rupuerunt; et ibi fuit Bzdina letaliter sagittatus.

Deinde eodem anno ad castrum Kamenicze, in quo virgo de genelogia dominorum de Usk erat, processerunt et ibidem cum gentibus domini Menhardi de Nova domo conflictum habuerunt et vicerunt et quosdam interfecerunt, quosdam captivaverunt et quidam in castrum fugierunt, ubi per XIV dies iacentes ipsum castrum cum machinis et pixidibus lucraverunt et eorum XL captivarunt in militarem captivitatem et ipsum castrum ruperunt. Ibidem mortuus est Johannes Bzdinka et dominus Bohuslaus de Sswamberk in locum ipsius in capitaneitate successit.

Eodem anno, videlicet MCCCCXXV ante festum sancti Wenceslai in Austriam processerunt et ibi multa dampna intulerunt et ante festum sancti Martini ad civitatem Recz venerunt et ibi per XIV dies iacentes ipsam civitatem hostiliter lucraverunt et ibidem comitem eundem cum filio et uxore dictum de Herdek cum multis militibus et clientibus captivarunt et Pragam adduxerunt et in eadem civitate multos interfecerunt, reliquos cum civitate concremaverunt. Et idem comes Prage in captivitate existens post duos annos diem suum clausit extremum ad festum sancti Spiritus. Sed ante dictam civitatem Recz dominum Bohuslaum capitaneum ad caput letaliter sagittarunt et post paucos dies mortuus est.

Et ex predictis gentibus due secte facte sunt, quarum una Taborensis, alia vero Orphanorum appellabantur, ubi (inter) Taborienses quidam Bleh primo et presbiter Procopius, inter vero Orphanos, quondam gentes Zizkonis, quidam Kunes et Kralowecz pro capitaneis successerunt.

Anno domini MCCCCXXVI post festum Pasche predicte gentes ad Pragam venientes una cum Pragensibus simul versus civitatem Ust super Albea processerunt et ipsam civitatem circumvallaverunt et machinis et pixidibus et per fossiones (et) subfossiones sub muros et fossata ipsam civitatem lucrare conabantur, super quam defendendam marchiones Misnenses suas gentes ipsorum ad liberandum eos usque, ut dicebatur veridice, equitum decem milia et peditum viginti milia disposuerunt, inter quos erat capitaneus quidam dominus Okss et dominus de Waydow et de Sswarczpurk et alii comites, domini ipsorum marchionum, et versus ducem Sigismundum Litwanie, qui inter Pragenses erat capitaneus, cum quo erat dominus Boczko de Podiebrad, dominus Hynko de Colsstain et quidam domini de Moravia, videlicet de Towaczow et domini Petri filius de Straz et prescripti capitanei et presertim presbiter Procopius; et sic hinc inde ad se invicem cum curribus, cum pixidibus, cum peditibus et equitibus aciebus ordinatis in bellum prope predictam civitatem processerunt et multis interfectis hinc et inde Misnenses fugam dederunt, ubi insequendo eos pars adversa bene, ut dicebatur, duo milia interfecerunt et alia duo milia per calorem et pulveres in armis fatigati sunt in loco et in via mortui, quia ipsos per 1 miliare insequebantur necando seu eos interficiendo; et hec facta sunt ipso die dominico post Sic mane, quare nullus die dominico conflictum sapiens intret, quia Misnenses inceperant.

Eodem die hii, qui in dicta civitate erant circumvallati, pre timore de civitate fugierunt et ipsi ipsam civitatem intrantes milites utriusque sexus interfecerunt et ipsam civitatem concremaverunt (cum) nonnullis hominibus.

Immo pre timore Misnenses castrum Plangstain domino Sigismundo de Dieczin tunc dederunt non ausi diucius ibi manere, qui per plura tempora ipsum in sua habebant potestate.

Anno domini MCCCCXXVI feria VI ante Philippi et Jacobi apostolorum B. cepit infirmari in oculo sinistro et infirmabatur quatuor septimanas et causa infirmitatis, ut creditur, balneum et cruda assa et multa comestibilia.

Eodem anno feria VI ante festum sancte Marie Magdalene idem cepit infirmari in oculo dextro ex causa balnei et bibicione vini rubei et tristicia et infirmabatur usque post festum sancti Laurencii.

Deinde presbiter Procopius, capitaneus Taboriensium, et Kunsso et Kralowecz, capitanei Orphanorum, illius secte per Zizkam relictorum, cum Pragensibus, dicto duce Sigismundo Litwanie et cum domino Boczkone de Podiebrad in displicenciam inierunt pro eo, quod ulterius cum ipsis in campis iacere noluerunt. Tandem post tres vel quatuor septimanas post predictum prefati presbiter Procopius, Kunsso et Kralowecz cum eorum sectis castrum Podiebrad et dominum Boczkonem predictum circumvallaverunt et ipsum cum magnis pixidibus et machinis hostiliter conabantur expugnare ultra quinque septimanas et nequientes lucrare ob duram defensionem et audacem abinde recesserunt. Eodem anno post tres vel maxima post quatuor septimanas idem dominus Boczko ante Nymburgam civitatem cum complicibus conscriptarum sectarum, qui ipsam civitatem tunc tenebant, conflictum intravit et, priusquam sue tote gentes, quos secum in campis habebat, advenerant, ipse dominus Boczko fuit letaliter sagittatus et post paucos dies mortuus.

Eodem anno ipso die sancte Marie Nivis gentes marchionum Misnensium contra Pragenses, dominum Hinkonem de Kolstain, qui circumvallaverant castrum Pontem, dictum Most, et ipsum per plura tempora retroacta, ut puta per quinque septimanas, cum aliis eorum subscriptis complicibus per machinas et pixides magnos et per sturm ipso die ultimatim lucrare conantes, tandem gentes Misnenses contra ipsos bello processerunt cum equitibus, pedestribus et curribus et sic se invicem percusserunt, quod ex utraque parte ad XV centena fuerunt interfecti; et sic a se ipsis recesserunt, nocte vero adveniente Pragenses de campis fugierunt et in loco unum magnum pixidem olim Montanorum et machinas et nonnullos currus dimiserunt, Misnenses vero adhuc in ipso die ad castrum predictum et civitatem equitaverunt, in crastino vero ipsum pixidem et machinam cum rebus per Pragenses relictis Misnenses cum civibus dicte civitatis ad civitatem Pontem receperunt et communiter dicebatur, quod hinc inde equalitas fuit interfectorum.

Zleby

Anno domini MCCCCXXVII predicti capitanei cum eorum sectis tempore quadragesime et post versus Zitaviam processerunt et ibi quodam modico conflictu prehabito ad civitatem dictam Laub retro Gerlicz et civitatem dictam Colperk venientes expugnaverunt et predam magnam receperunt in civitates ipsas concremaverunt et destruxerunt, ymmo et districtus ipsorum per aliquot septimanas iacentes in campis ibidem et pecudes in magna multitudine secum in Boemiam adduxerunt.

Deinde post festum Pasce ad castrum Czerwena hora domini Hinkonis de Abrspach venerunt et ipsum circumvallarunt et per aliquot dies ibi iacentes ipsum castrum tractatibus mediantibus, sic quod gentes de eodem liberos abire permiserunt, aquisiverunt et ipsum castrum concremantes deinde rupuerunt.

Deinde circa festum Penthecostes ad civitatem et castrum Zleby, quem tunc dominus Hassko de Dietenicz tenebat, venerunt et ibi per aliquot septimanas dure machinis et pixidibus magnis ipsum castrum lucrare conantes ipso die s. Johannis Baptiste per tractatus, sic quod hos, qui in castro et civitate erant, liberos abire dimiserunt, aquisiverunt. Et primo ipsorum adventu civitatem cremaverunt, deinde post castri dacionem et ipsum castrum excremaverunt et deinceps rupuerunt.

Zluticz

Anno domini MCCCCXXVII marchiones cum Misnensibus, Brandeburgensibus et langravius de Durink necnon duces Bavarie Hanusius, Fridericus langravius cum aliis principibus et comes de Swarczpurk ac episcopi Magutinensis et de Tryr, de Pamberg, de Wirczpurk et multi alii episcopi et principes ipsa septimana post festum sanctorum Petri et Pauli apostolorum ad Boemiam venerunt cum gentibus civitatum imperii et venerunt in civitatem Zluticz et ob timorem Jakubko, capitaneus Wiklefistarum, cum suis complicibus de civitate eadem fugierunt et Teutunici ipsam intraverunt et domino Alssoni de Sstermberk alias de Holicz eandem civitatem restituerunt.

Et deinde feria IV ante s. Jacobi civitatem Mizam circumvallarunt, que ipso anno ante carnisprivium erat in nocte per Przibikonem de Klenowy et gentes Zmrzlikonis per scandicionem aquisita, et ibi ipsum Przibikonem bene cum ducentibus equitibus, ipsius complicibus, circumvallarunt et de magnis pixidibus ipsam civitatem sagittaverunt. Pragenses vero cum presbitero Procopio et aliis sectis Taboriensium et Orphanorum cum aliis eorum capitaneis et eorum complicibus, inter quos nullus notabilis dominus erat terrestris, congregantes de civitatibus et villis ad XV centena equitum et XVI milia peditum cum curribus et pixidibus eorum versus predictos principes, qui ut dicebant, plus quam LXXX milia equitum et tantum vel plus peditum, processerunt; ex parte vero Teutunicorum et cum ipsis erant domini Krussina de Sswamberk, Wilhelmus de Sswihow et alii milites et armigeri districtus Plznensis et gentes civitatum Plzne et Tachowie. Et cum predicti Taborienses et Pragenses ad ipsos Theutunicos appropinquaverunt per tria adhuc miliaria vel citra, predicti principes a dicta civitate Myza versus Bavariam fugierunt, in qua fugacione pixidem magnam domini regis Sigismundi predicti principes per cives Plznenses mutuatum in Thachovia reliquerunt, soli vero cum curribus ultra silvam ad propria redierunt. Inter quos, ut dicebatur veridice, erat quidam cardinalis a domino papa datus, ut cum ipsis in campis contra hereticos et Wiclefistas procederet, qui cardinalis in huiusmodi fugacione a fuga ante ipsos vexilla, videlicet pape, imperii et crucem ostendit et erexit, ut recordati fugam non darent, et ipsos multis verbis ammonens, ultimo videns, se nichil idem cardinalis pro se proficere, vexilla distraxit et in terram ante ipsos Teutunicos proiecit et ipsos non modice maledixit. Quidam vero miles dictus Camrowecz: nescio, contra quem fugere, neminem video inimicum. Et sic cum domino Wilhelmo de Sswihow in Thachoviam equitaverunt. Et hec fugacio facta fuit post sancti Jacobi.

Feria vero II post festum Jacobi predicti Thaborienses cum Pragensibus ante Thachoviam venerunt et ipsam civitatem circumvallaverunt et nonnullis diebus, citra tamen unam septimanam, ibi iacentes ignem ad civitatem de balistis sagittantes ipsam civitatem incenderunt et in muro foramina effodentes ad civitatem vi pervenerunt et ibi in platea predictum militem Camrowecz cum quinquaginta ipsius sociis, Theutunicis et Bohemis, interfecerunt, predictus vero dominus Wilhelmus de Sswihow cum domino Henrico dicto Zito, cum ipsorum clientibus et civibus ad castrum ibidem fugierunt et ibi se usque tercium diem defenderunt et ultimo ad ipsorum captivitatem militarem se dederunt eorum, ut dicebatur, noningenti. Et ibi pixidem dictum chmelik magnum receperunt. Post paucos dies dominus Wilhelmus predictus cum magistro Arnosto et eorum XXII de campis ipsis de captivitate evaserunt. Deinde ad castrum Rupow processerunt et dominus castri eiusdem cum ipsis Taboriensibus concordiam fecit et ad campos se cum ipsis converit et processit. Deinde ad civitatem Plznam processerunt et non valentes eandem lucrare treugas pacis ad festum Georii fecerunt.

Dominus Hynko Pragam venit

Anno eodem, videlicet MCCCCXXVII, sabbato ante Nativitatem beate Marie Virginis mane dominus Hinko de Kolstain, Johannes Smirziczky, dominus Venceslaus miles de Raczinawes, dominus Ahnik miles, dominus Venceslaus miles dictus Smatlay, Parczifal de Winarzicz et alii clientes et armigerii ipsorum cum gentibus domini Johannis de Opoczen et domini Puothe de Czastolowicz, domini Michalczonis, universo eorum bene equites CCC et quinquaginta vel citra, Pragam sperantes in eorum promissa et iuvamen portis apertis ad Maiorem civitatem ad plateam sive circulum venerunt et clamantes heslo "pax sancta" expectabant a civibus adherenciam et iuvamen, qui ipsis nichil iuverunt, sed portis et cathenis reclusis ipsos hostiliter sagittaverunt et percusserunt ex omnibus partibus. Ipsi vero videntes tradimentum evidens ad cathenas venientes cum gladiis et cultellis aliquot cathenas effregerunt, circa quam effraccionem nonnulli ipsorum sunt interfecti, et dominus Hinko ad quamdam domum dictam ad Elefantes fugit et ibi de domo est proiectus et interfectus, alii vero de Maiori civitate cathenis effractis ad Novam civitatem pervenerunt et quidam in domibus, ut Parcifal, se absconderunt et quidam ad Wissegradum venientes per muros, alii per fenestras saliverunt et deinde per Multaviam in Carlstain eorum quinque fugierunt, in quo conflictu bene centum interfecerunt et CCXXXI captivarunt et ex ipsis quendam Venceslaum Gynecky decollaverunt cum eorum buotine et sic quod forte vix XV evaserunt.

Eodem anno feria V post Nativitatem beate Marie Virginis presbiter Procopius et Thaborienses et Orphani cum eorum complicibus eorum bene ad X milia peditum et VIIIC equitum Pragam cum eorum voluntate venerunt et pixidem magnum chmelik secum ibidem adduxerunt cum eorum curribus et pertinenciis.

Deinde quia civitas Colonia se a Pragensibus alienaverat et pro capitaneo dominum Hasskonem de Dyetenicz ipsis reciperant, qui domino regi et duci Austrie, qui filiam dicti domini regis habebat, videlicet dux, adheserat viceversa, videlicet dominus Hassko: extunc predicti presbiter Procopius, Thaborienses, Orfani et Pragenses civitatem ipsam Coloniam circumvallaverunt et per XIII septimanas ibi magnis machinis et pixidibus et per multiplices astucias ipsam civitatem acquirere continuantes, tandem non valentes malivole eam aquirere per tractatus amicabiles et de voluntate civium Divisius Borzecz cum C ipsius et dominorum Johannis de Miestecz et Puothe de Czastolowicz familiaribus de ipsa civitate cum rebus ipsorum equitaverunt. Et qui ante civitatem iacuerunt, se de ipsa civitate intromiserunt.

Eodem anno sabbato ante Bartholomei Bolochowecz, Sigismundus et Buzko armigeri tunc in Carlsstain degentes cum familiaribus dicti castri quendam predonem dictum Zakon de Ostromecz metseptimum prope opidum Mnissek interfecerunt in spolio repertos de secta Thaboriensium et sex evaserunt, licet ipsorum adhuc tres graviter vulnerati.

Eodem anno predictus presbiter Procopius dictus Holy, capitaneus secte Taboriensium, et secundus Procopius presbiter, capitaneus secte relicte Zizkonis, qui se Orphanos appellaverunt, cum eisdem sectis et cum Pragensibus versus Ungariam traxerunt et ibi multas civitates, videlicet Brodam Ungaricalem etc. et multa opida et fortalicia aquisiverunt. Ymmo ante civitatem Prespurk suburbium excremaverunt, deinde ante Wiennam processerunt, sed illuc per Danubium venire non valentes ex ista parte in Austria per voraginem ignis magnum nocumentum fecerunt.

Deinde anno domini MCCCCXXVIII se in Slesiam diverterunt et prope civitatem Nissam castra metarunt, dominus vero Puota de Czastolowicz cum gentibus dicti episcopi in civitate eadem erat, quidam vero de suburbio et villani, qui convenerant, de suburbio contra ipsos exiverunt. Ipse vero secte cum curribus et ipsorum armis et pixidibus contra ipsos processerunt et conflictum inierunt, tandem qui de civitate exiverunt in suburbium venerunt. Et ibi aliquot milia hominum utriusque sexus interfecerunt et suburbium excremaverunt et, nisi dominus Puotha de Czastolowicz cum suis et sibi adherentibus viriliter non defendisset, eciam et ipsam civitatem lucrassent.

Deinde anno eodem versus civitatem ducis Ludvici dictam Brzych processerunt et in via in medio multas civitates, opida, fortalicia, ymmo et castrum dictum Sobotka obsederunt et suos familiares ibidem, videlicet dominum Plichtam de Zirotin iuniorem et alios ibidem dimiserunt, ad civitatem vero Brzych venientes ipsam, cum pauci erant defendentes, intraverunt et ipsam expoliantes excremaverunt, ymmo et civitatem dictam Ostryhom seu Strig similiter destruxerunt et alias plures civitates et opida et fortalicia in eodem districtu aquisiverunt et destruxerunt et excremaverunt ante et post festum Pasce et Penthecostes et circa et abinde multa milia pecorum et pecudum in Boemiam apulerunt. Qui in reditu divisi, tandem secta Orphanorum cum Pragensibus in Bavariam processerunt circa festum Urbani et illuc venientes civitates Pernow, Mnichow et alia opida aquisiverunt, quia ipsas non defenderunt, et ad piscinam magnam langravii venientes obstaculum suffoderunt et piscinam destruxerunt et ante Cubam multum nocumentum fecerunt; deinde Pragam sunt reversi circa festum Margarethe. Secta vero Thaborensium illa septimana feria V ante festum Margarethe castrum et civitatem dictum Bechynie circumvallaverunt et in quatuor partibus circumiacuerunt, inter quos fuit capitaneus presbiter Procopius, et ibi circa XV septimanas iacuerunt castra metati et pixidibus magnis et minoribus multis et machinis ipsum castrum et civitatem lucrare per violenciam conantes; ultimo Hencz de Lazan cum prodomino castri et quidam Kokot capitaneus ulterius resistere non valentes et cum ipsis alii ultra centum, licet multi vulnerati, per tractatus, quod ipsos solos liberos dimiserunt, de ipso castro et civitate ipsis condescenderunt illa septimana circa festum sancti Galli.

Eadem estate rex Sigismundus ante castrum Holubecz in terra Racz, quem olim dux Dispis communiverat, castra metaverant et dominus Zdeslaus capitaneus in conductu Pasce.

Eodem anno feria V et sexta secta Orphanorum, inter quos fuit capitaneus quidam de Kralowicz cives et presbiter Procopius dictus Holy sive minor Procopius, castrum Lichmburg circumvallarunt et ibi castra metarunt et bastas sive fortalicia et sepes circumfecerunt et ibi solum iacuerunt pixidibus magnis et machinis non utentes, quod castrum tunc tenuit dominus nobilis Johannes de Opoczan, et tunc in castro erat quidam capitaneus Liska cum aliis sociis CCC, ut dicebatur.

Anno domini MCCCCXXIX illa septimana post festum sancti Martini predicti Liska capitaneus cum aliis consociis suis ob defectum victus se diucius deffendere non valentes domino ipsorum domino Johanni de Opoczen significarunt. Qui dominus Johannes hoc idem senciens cum dicto Kralowecz et aliis in obsidione iacentibus fecit talem concordiam, sic quod ipsum castrum dedit ad fideles manus ad tenendum famoso dicto Hertwik et, si ipso anno dicti Kralowecz (etc.) cognoscent evidenter, quod ipse fideliter tenet et iuvat eos, extunc ut sibi ipsum castrum restituerent; obsessos vero de castro liberos cum eorum rebus abire permiserunt.

Anno eodem, videlicet MCCCCXXIX, presbiter Procopius et secta Taboriensium comisso castro Bechina Johanni dicto Bleh se cum comitatu suo versus et in Austriam transsumpsit et equitavit, ibique dominus Menhart de Nova domo cum aliis baronibus Boemie et Moravie se interposuerunt et ipsum presbiterum Procopium cum serenissimo domino Sigismundo rege suprascripto et cum ducibus Slesie ad terminum et tractatus conduxit, qui in civitatem Prespurk feria III in festo Pasce anno etc. XXIX convenerunt; et ibi fuerunt dominus rex cum duce Austrie et ducibus Slesie, domino Ulrico de Roznberk, dominis Johanne et Wilhelmo de Skala, Johanne de Opoczen, Puotha de Czastolowicz, Hanussio de Kolowrat et aliis baronibus regni Boemie et strenuo Zdeslao Tluxa de Burzenicz, tunc burgravio in Carlsstain, et famoso Henrico Zito, tunc burgravio in Przinda, cum multis aliis baronibus, dominis, nobilibus et civitatibus domino regi adherentibus, militibus et clientibus sive armigeris ex una, et dicto presbitero Procopio et nobili domino Menhardo de Nova domo et domino Petro de Straznicz iuniori et Pragenses cum eorum complicibus parte ex altera; per unam septimanam tractatus de concordia et pace in regno Boemie et Moravia fecerunt et factis inicio conpetenti ad Pragam eorum pars est reversa ad deliberandum, que a domino rege dici audierunt. Et tractatibus factis, si de communione sub utraque specie vellent stare declaracione sacri consilii futuri, cum aliis eorum complicibus responderunt per indirectum, sic quod nulla concordia potuit evenire.

Anno eodem, videlicet MCCCCXXIX, post festum sancti Georgii Habardus de Adlar, tunc residens in castro Tyrzow, cum Johanne dicto Smykusky et nobili domino de Donin Friderico et aliis domini regis predicti servitoribus eorum equitum CLIIII versus Pragam hostiliter pervenerunt et circum Pragam et penes pecora ultra CC conabantur abegere et abegerunt usque prope monasterium Aule Regie, ibique mox cives et scabini et eorum complices de Nova civitate Pragensi eos equites et in curribus et pedites sunt hostiliter insecuti ipsos prope dictum monasterium insequentes simul conflictum inierunt in ripa prope Multaviam et in flumine Multavia; quidem Habardus cum suis sociis Pragenses strenue vicit et eorum, ut dicebatur, ultra XXIV cum curribus in flumine submersit in conflicto faciendo et interfecit et CLXVI captivos, quosdem iuratos et cives predictos, ad dictum castrum Tyrzow cum armis adduxit et, nisi potencia civium Antique civitatis supervenisset, ymmo et pecora ad castrum abegisset; quos sic in sua captivitate dure XII septimanas tenuit et postea eos dedit super fideiussoria caucione in tribus milibus sexagenarum. Quo pacto et concordia interveniente (cum) predictis captivis cives Nove civitatis duo milia cum CCCCIV ipsi Habardo persolverunt.

Eodem anno circa festum sancti Johannis Baptiste Johannes Kromiessin, capitaneus presbiteri capitanei Procopii et Taboriensium, circumvallarunt castrum Lansperk, quod tunc tenuit nobilis dominus Johannes Opoczen; Ales de Frymburg presbiterque Procopius cum quibusdam dominis de Boemia et Moravia ad regem Sigismundum ad tractandum de concordia tunc secundario in Prespurg de Praga equitavit. Qui Johannes Kromiessin dictum castrum per machinas quatuor et duos magnos et alios quam plures pixides circa festum Lamperti ipsum castrum per potenciam aquisivit; et quos ad castrum captivaverunt, ipsi illos et isti istos de castro a captivitate hinc inde dimiserunt cum eorum pariter rebus, quas portare potuerunt dumtaxat.

Eodem anno feria II ipso die sancti Benedicti Johannes Bleh, tunc in Bechyna residens, et Nicolaus de Paderow, capitaneus de Ostromecz, cum civitatibus Piska, Sicca, Glatovia et eorum complicibus se ante castrum Zviekow posuerunt et in uno monte contra castrum castra metarunt quasi pro parte ipsum castrum circumvallantes, quod castrum tunc tenuit nobilis Kunrat de Wintmberk ex parte domini regis Sigismundi suprascripti. Qui iacentes ibidem XIII septimanas et ultra treugas pacis ad duos annos facientes et ipsum novum castrum excremantes, quod Taborienses construxerant, abinde recesserunt.

Eodem anno, videlicet XXIX die XIX Augusti obiit dominus Johannes de Leskow, olim subcamerarius regni Boemie, in castro Carlsstain et in ecclesia sancti Palmacii sepultus est.

Eodem anno feria III in vigilia s. Venceslai predictus presbiter Procopius ad dictum Johannem Kromiessin et ad complices suos Taborienses in campis continue bellantes versus Zitaviam equitavit, qui presbiter Procopius tunc se scribebat in literis presbiter Procopius, gubernator Taboriensium communitatis in campis bellancium. Et ipso die sancti Venceslai feria IV Wellek laborator zonarum et Pesczek ortulanus, capitanei, et presbiter Procopius minor Orphanorum cum XC curribus bellicis et CCCC et ultra equitibus et duobus milibus peditum se post dictum presbiterum Procopium sibi ad iuvamen transtulerunt similiter versus Zitaviam et contra dictum terretorium Luzacie ad devastandum; predictus vero Johannes Kromyessyn et presbiter Procopius, ut dicebant veridici, in eorum secta et comitatu habuerunt CXXX currus bellicos et CCCC et citra equites et quatuor milia peditum vel citra et multas pixides minores sicut caput lapis potuit intrare. Et sic devastantes quasdam civitates et opida per totum ducatum Luzacie processerunt vi et potencia usque ad quandam civitatem Gubyn in metis marchionatus Brandeburgensis, ymmo et ipsam civitatem Gubyn per potenciam lucrantes per sturm multos captivos Teutunicos nobiles et cives captivarunt et secum ad Boemiam cum centum milibus pecorum, ut dicebatur, et cum magna preda in curribus adduxerunt et ipsam civitatem Gubin excremaverunt et destruxerunt et reversi sunt circa festum sancti Martini Boemiam.

Eodem anno etc. XXIX circa festum sancte Lucie omnes predicte secte, videlicet presbiteri Procopii, Johannis Kromiessin, Kralowczonis, Pesseczkonis, Weleczkonis, Pragenses et Taborienses, ut dicebatur, cum 3 milibus equitum, cum 2 milibus curribus et cum XL milibus peditum vel citra ad marchionatum Misnense se hostiliter et per potenciam transsumpserunt et ante civitates Perno et Drazdan castra metantes iacuerunt et ipsum marchionatum destruentes ad diversos districtus pervenerunt.

Et notanter circum Perno et Drazdan preurbia et districtus circumcirca depredantes et concremantes villas, opida et nonnulla fortalicia et municiones se ante castrum et civitatem Misnecz posuerunt et suburbium excremaverunt. Sed quia Misnenses contra ipsos hostiliter in campis processerunt et ipsi contra eos, sic quod circa flumen dictum Mutna quendam conflictum inierunt. Sed Misnenses non plene conflictu inito fugierunt. Sed Misnenses bene quadraginta nobiles captivarunt. Et fugierunt ad marchionem in civitatem Lipsk, qui marchio pre timore solus preurbium ante Lipsk fecit suis concremari; deinde predicti Boemi processunt ad civitatem Altmburk, de qua civitate pre timore homines fugierunt, et Boemi supervenientes civitatem depredantes excremaverunt. Deinde processerunt per marchionatum Misnensem civitates, opida, villas concremantes et castra et fortalicia, ymmo et monasterium dictum Cella expugnantes concremaverunt. Deinde depredantes et cremantes processerunt contra dominum Henricum de Plawno et ad eandem suam civitatem et castrum ibidem venientes ipsos uno die per pixides et per sturm et potenter lucraverunt et nobiles et feodales ac cives, capitaneum in castro et burgravium captivaverunt et omnes eorum bene septingentos interfecerunt et de castro per muros proiecerunt; sed idem dictus Henricus tunc erat in suo castro dicto Kungswart. Et sic dictum districtum devastantes et concremantes ad ultimum se in Bavariam ad civitatem Hoff burgravii Nornbergensis transsumserunt, quam civitatem expugnantes et depredantes concremaverunt, similiter et civitatem Karlmach. Deinde processerunt ad civitatem et castrum eiusdem burgravii Karbnach et ibi civitatem tantum expugnaverunt et excremaverunt; et ibi dictus burgravius Nornbergensis Fridericus, qui tunc eciam erat marchio Brandemburgensis, ad ipsos veniens cum conductu salve pacis se, ne sibi et territoriis suis infra hinc festum sancti Jacobi nocerent, concordavit et pactavit, ut ipsis XIIII milia florenorum rinensium daret, similiter et cives Nornbergenses ibidem venientes eandem concordiam iniverunt et XI milia florenorum, ne ipsis ad eorum districtum venirent, pocius dederunt et cives Pampergenses ibidem eciam venientes similiter concordaverunt et ipsis IX milia florenorum dederunt. Et dux Johannes Bavarie de Amberk similiter ad eos veniens, ne ad ipsius territorium intrarent, ipsis pocius X milia florenorum dedit predictorum. Et ad castrum Pohmstain quosdam de suis direxerunt, ut adtemtarent; qui Teutunici ipsum castrum uno die defendentes statim eadem nocte future de castro eodem fugierunt. Boemi vero mane surgentes et, quia nullus erat in castro, de eodem se intromiserunt et multam et bonam necessitatem ibi invenerunt; et concordia predicta facta cum dicto burgravio Normbergensi sibi dictum castrum restituerunt viceversa, deinde ad civitatem Egram dictam Cheb procedentes ibi dictum districtum depredaverunt et destruxerunt, ymmo et preurbium excremaverunt et sic dicti cives de Egra videntes suam et districtus sui magnam destruccionem cum ipsis eandem concordiam et pactum, prout priores, fecerunt et ipsis mille cum septingentis florenis dederunt, deinde ad castrum Kunsward domini Henrici de Plaun venientes, iacere nolentes propter nimiam replecionem prede in curribus ipsum districtum expugnaverunt, depredantes et excremantes ad Boemiam per quatuor vias sunt reversi; et, ut dicebant veridice nobiles domini dominus Smil de Sternberg alias de Holicz, dominus Johannes de Moravia de Pernstain et famosus Geniko, tunc capitaneus de Litomysl, qui cum ipsis circa predictas expugnaciones fuerunt ubique, quantum habuerunt equitum ultra XX milia et peditum LII milia, curruum tria milia et in quolibet curru pre multitudine prede minime sex equi, hoc octo, X, XII, XIV equi aliquos currus vix trahebant et vegerunt; et dicebant, quod bene civitates munitas, castra fortalicia circummunita ultra centum aquisiverunt, destruxerunt et concremaverunt; et capitaneum de Lipsk et quosdam barones Misnenses captivos secum adduxerunt; qui reversi sunt ad Boemiam et Pragam anno domini MCCCCXXX eadem septimana ante et post festum sancti Mathie ante carnisprivium.

Eodem anno in quadragesima traxerunt in Slesiam et ibi iterum magnum dampnum et predam fecerunt et multa milia pecorum et pecudum secum in Boemiam abegerunt. Et civitates Brigam dictam Brzeh et Niemcz suis obsederunt et suos ibi in dictis civitatibus in possessione dimiserunt.

Deinde eodem anno post festum Pasce divisi sunt in duo agmina dicta woyska, sic quod Welko capitaneus cum Parvo Procopio presbitero et cum Johanne Zmrzlik et cum quibusdam de Nova civitate Pragensi, eorum ipsius civitatis quarta parte, et cum tota secta Orfanorum et magna parte Taboriensium et presertim cum Philippo, tunc capitaneo in Ostromecz, se ad metas regni Ungarie protraxerunt et equitaverunt et perrexerunt et ibi duos conflictus, unum cum quibusdam capitaneis domini regis Sigismundi de Moravia in metis Austrie habuerunt, ubi eiusdem secte Taboriensium et Orphanorum, ut dicebatur, circa quandam ecclesiam in Moravia in metis Austrie centum et quinquaginta sunt interfecti et plures. Secundum vero conflictum seu certamen habuerunt in metis Ungarie cum gentibus dicti domini regis et presertim Boemis, Moravis, Ungaris et gentibus dictis Raczy, ubi Welko, capitaneus Orfanorum, est interfectus cum multis aliis, ut dicebatur, ad duo milia et in villis sunt concremati, et presertim Johannes de Stezow et Martinko, familiares Johannis Zmrzliconis, et dicebatur, quod ipsis equi sunt in curribus et sub equitibus interfecti et mortui ultra duo milia; et sic successive per quasdam aquas et lutositates pontes facientes in nocte fugierunt et Pragam reversi sunt.

Anno eodem etc. XXX feria III ante Margarethe suprascripti recipientes ipsis Prage loco Welkone quendam sarratorem dictum Czert, quem militem licet ribaldum fecerant, pro capitaneo se ante fortalicium Horzowicz, quod tunc quidam Sigismundus de Egra hereditarie tenuit et possedit et tunc dominis Hanussio et Friderico de Colowrat residentibus in Krassow et Libsstain servivit, cum pixidibus satis magnis et una machina posuerunt et cum ipsis pixidibus et machina in ipsum fortalicium sagittaverunt, proiecerunt et sic diebus novem transactis ipse Sigismundus tractatu, ut cum ipsis esset et ad campos cum ipsis traheret, sicut mox traxit, ipsum fortalicium et bona ipsis dedit et ipsi ulterius ea bona Johanni Zmrzlikoni potenter dederunt.

Eodem anno etc. XXX feria V ante festum sancte Marie Magdalene idem omnes et cum eis in adiutorium Zatenses et Lunenses, Slanenses, et armigeri et gentes ipsis adherentes cum magnis pixidibus tribus et multis aliis minoribus et cum tribus machinis castrum dicti domini Friderici dictum Libsstain circumvallaverunt, in quo castro erant capitanei Johannes dictus Smykusky et Johannes dictus Bukowsky, et ibi dictis pixidibus et machinis sagittantes et per sturm et aliis diversis modis ipsum castrum conabantur aquirere et lucrare; ipsi vero se viriliter defenderunt; in quo castro erant in dicta obsidione eorum boni famuli ultra LXXX; ultimo cum ibi iacuerunt septem septimanas, dominus Fridericus et dominus Hanussius, frater ipsius, de Krassow cum ipsis tractatus amicabiles iniverunt et sunt cum ipsis amicabiliter concordati et ad Antiquam civitatem Pragensem et presbiterum Procopium et ipsorum sectas converserunt et ipsis fidelitatem et iuvamen promiserunt; et sic a dicto castro recesserunt.

Presbiter vero Procopius, cum sic secta Orphanorum, ipsius secta et capitaneus suus Johannes Kromiessin divisi erant, se cum omni agmine suo in Moraviam transtulit et magnum nocumentum circum Brunam civitatem fecit et castrum Stermberk, quem tunc vidua uxor domini Petri tenuit, circumvallavit et ibi per octo septimanas iacens, ipsum castrum per tractatus dicta vidua sibi et ipsis dedit in potestatem. Deinde dictus presbiter Procopius cum dicto exercitu eadem septimana ante et post Assumcionem beate Marie virginis ad Boemiam venerunt et ad districtum Plznensem et circum Plznam magnum fecerunt nocumentum; dominus vero Johannes de Opoczen cum suo exercitu ad ipsos venit ibidem in adiutorium dicto presbitero Procopio et suis complicibus, qui se multis septimanis per dictum districtum hinc et inde destruentes iactabant et equitabant cum uno mille equitum et bene X milibus peditum et septem sexagenis curruum.

Anno etc. XXX feria V post Procopii mortuus est famosus Przedbor de Radisina in Carlsstain. Et post aliquot septimanas cum responsione refutatoria per ipsum contraria revenerunt a rege Polonie.

Eodem anno etc. XXX circa festum Bartholomei idem presbiter Procopius, Jacobus Kromiessin, dominus Johannes de Opoczen cum suis supradictis complicibus se in Slesiam diverterunt et civitatem et castrum Otmochow episcopi Wratislaviensis cum pixidibus et per tractatus aquisiverunt et in dicto territorio magnum nocumentum fecerunt.

Anno domini etc. XXXI concordati simul Orphanorum secta cum secta presbiteri Procopii in Montibus Cutnis et deinde simul omnes in territorium Luzacie et ante civitatem Zitaviam in ieiunio diverterunt et suburbium destruxerunt et concremaverunt et ad regem Polonie de secta predicta eorum quidam pro consilio et auxilio tunc tempore ieiunii equitaverunt. Rex vero Sigismundus eciam sabbato ante carnisprivium de Constancia cum multis principibus et episcopis Nornbergam revenit et ibidem ultra medium quadragesime permansit.

Anno ut supra feria II post Lamperti interfectus est Mauricius Kropacz prope Karlsstain mane.

Eodem anno circa Nativitatis domini mortuus est famosus Mathias Brus de Kowarzow in Zwiekow.

Eodem anno, videlicet MCCCCXXXI tempore ieiunii feria V ante festum Annuncciacionis hora post meridiem interfecti sunt ex vulneracione sagittarum famosi domini armigeri Johannes de Wrabie et Nicolaus dictus Gineczky et tercius Benessko ante fortalicium Wiklefisco Orphanonorum Knanconis et ipsi volebant per sturm viceversa lucrare ipsum fortalicium et sic interfecti.

Ipso anno circa Ascensionem domini fuit magnus concursus Wiklefistarum Prage, deinde secta Orfanorum se transsumsit in territorium Luzacie ante civitatem Lybawam, quam Wiklefiste obsederant, et quidam de secta Orphanorum et Theutunici tunc ipsam circumvallaverant; tunc eciam dominus Zdeslaus et dominus Nicolaus de Lobkowicz fuerunt nunccii ex parte domini Sigismundi regis Prage concordiam ex parte dicti domini regis attentantes; tunc eciam Pragenses et Thaborienses dominum Wilhelmum Kostkam et Benessium de Mokrowus cum quibusdam civibus cum domino Zdeslao ad dominum regem Sigismundum in Egram civitatem pro audienda voluntate sua destinaverunt. Qui post duas septimanas reversi sunt a domino dicto rege sine omni fine de Egra.

Eodem anno XXXI in vigilia sancti Petri et circa presbiter Procopius cum Johanne Kromiessin et eorum complicibus et equitibus, peditibus et curribus, ymmo post eum Pragenses omnium civitatum, cum ipsis quasi omnes civitates munite de Boemia preter Budweis et Pontem et Thyn Horssowiensem et preter Loket, alie vero omnes civitates, et quidem Genik de Nedanicz, qui tunc totum episcopatum Luthomisnensem potenter tenuit et occupavit, et Thaborenses cum secta Orphanorum et eorum sectis civitatem Plznam circumvallaverunt; et cum eis erant gentes et clientes domini Menhardi de Nova domo et dominus Hanussius de Kolowrat cum gentibus suis et sui fratris domini Friderici de Libstain iuvantes dicto presbitero Procopio, Pragensibus, Taborensibus, Orphanis et eorum sectis contra civitatem Plznam et contra dominum Crussinam de Swamberg, et ibi nichil lucrare valentes, sed multa blada destruentes et concremantes in campum ad Thyn Horssowiensem diverterunt et ibi suburbium concremaverunt circa festum sancti Jacobi, quam civitatem Tyn tunc tenuit famosus armiger Zdenko de Drstka, qui ipsam civitatem viriliter cum suis amicis et suis servis defenderunt, deinde predicte secte ex quadam fraude reverterunt, ut Theutunici in Boemiam venirent, ut infra scribitur, et in villis et opidis prope et circa castra Carlstain, Hradek, Lopata, Radynie et civitatem Plznam in bladis et frumentis magnum nocumentum per consumcionem et in pecoribus, pecudibus et equis fecerunt.

Eodem anno XXXI circa festum sancti Petri illustres principes Fridericus, burgravius Normbergensis et marchio Brandeburgensis, N. marchio Misnensis, Hanussius, dux Bavarie, et quidam a domino Eugenio tunc papa quarto missus cardinalis et alii multi principes, comites, barones et domini cum gentibus civitatum imperialium versus occidentem, ut communiter dicebatur, eorum quadraginta milia CCCL equitum et nonaginta milia vel citra peditum et novem milia curruum potenter in Boemiam venerunt et prope civitatem Tachoviam castra metarunt et in districtu illo duces circa duas septimanas iacuerunt et circum castrum Sswamberg et circum Thachoviam multa opida et villas, ut dicebatur ducentas et plus, concremaverunt. Presbiter quoque Procopius et alter presbiter Procopius dictus Bassus cum eorum sectis, videlicet Thaborensibus, Orphanorum et Wiklefistarum cum Pragensibus contra eos viriliter cum tribus milibus curruum, cum quinque milibus equitum et cum quinquaginta milibus peditum, ut communiter dicebatur, cum multis pixidibus, in quas sicut caput lapides intrare potuerunt, processerunt ante festum Assumcionis beate Marie virginis tercio et quarto diebus, Teutunici vero predicti cum presciverunt ipsos contra se procedere, per silvam retro Domazlicz fugierunt, ex istis vero quidam eos insequebantur per ipsam silvam et ipsis Theutunicis, ut communiter dicebatur, ultra tria milia curruum cum pixidibus magnis et minoribus bene CXXX cum eorum diversis rebus, vestimentis, armis, equis, cifis argenteis et cruce domini dicti cardinalis aurea receperunt et in huiusmodi insecucione ultra ducentos occiderunt et pro maiori parte Ytalicos dicti cardinalis et deinde in Boemiam cum magna preda revenerunt.

Dux Austrie

Eodem tempore Albertus, dux Austrie, qui tunc habuit filiam regis Sigismundi, Romanorum, Ungarie, Boemie, Dalmacie etc. regis filiam, qui rex sibi duci in dotalicium dederat marchionatum Moravie, ipsam Moraviam potenter et cum magno exercitu intravit, quia eciam tunc tenuit civitates Olomucz, Brunam, Giglaviam, Hradisstie, Znoymo. Pohorzelicze, Gemnicze et plures alias civitates, et tunc aquisivit per potenciam quoddam fortalicium dictum Kygiow et ibidem, ut dicebatur, eorum ultra quinquaginta captivaverunt et, ut dicebatur, omnes morti tradiderunt. Quidam vero tercia secta insurrexerat in Moravia, qui Mediocres vocati, quia voluerunt, ut tantum census legitimi legitimis dominis solvantur, alia onera iniusta ut transirent, sed corpus Christi ut sub utraque specie per communes homines comunicaretur, quorum, ut dicebatur, erant congregati XIV milia vel circa, quos dominus dux per potenciam de campis repulit, qui ad quedam castra et civitates fugierunt.

Presbiter quoque Procopius cum suis complicibus tunc in Slesiam erat diversus, quia sui in civitate Nyemcz per terrigenas erant obsessi et volebant eos cum magnis pixidibus et machinis per aliquot septimanas lucrare; et cum sensierunt presbiterum Procopium contra se procedere et prope esse, omnes de campis fugierunt ad castrum et civitates suas et ipse suos libertavit. Deinde ad alias sectas, videlicet Procopium Parvum et sectam Orphanorum et Taborienses in Moraviam processit; predictus quoque dux senciens eos contra se sic omnes eorum exercitus procedere, gentes suas ad civitates suas predictas et quedam sua castra iussit intrare et cum residuo in Austriam equitavit, predicte vero secte Taborensium civitates in Moravia tunc tenuerunt Ewanczicze, Crumlow, Gewissowicze, Towaczowicze etc. et in Austria quandam ecclesiam dictam Tagiow.

Rex Sigismundus quasi per totam illam estatem fuit Nornberge, sed post dictam fugam Teutunicorum occidentalium circa Nativitatem beate Marie virginis in civitatem Pazel pro generali consilio celebrando cum quibusdam principibus equitavit.

Eodem anno etc. XXXI circa et post festum Assumcionis beate Virginis terrigene territorii Luzacie circumvallaverunt civitatem, Wiklefistas(que) in eadem, dictam Libawa et per aliquot septimanas iacentes ipsam civitatem una cum gentibus in eadem aquisiverunt et lucraverunt per potenciam.

Eodem anno secundo vel tercio die ante Assumcionem beate Marie virginis de Antiqua civitate peregrinantibus cum corpore Cristi ex causa vindicte contra Teutunicos pons ante castrum Pragense cum dictis peregrinantibus ruptus est anterior, ubi, ut communiter dicebatur, XVI statim mortui et LX et ultra graviter offensi, quorum quidam mortui sunt in brevi.

Eodem anno sabbato post festum sancti Galli de secta Thaboriensi capitanei Toma de Wlassim et Nicolaus cum fratre dicti Sokolowe et Leskowecz cum eorum complicibus ad Austriam, ut dicebatur, sexcentis equestribus et quatuor cum medio milibus peditum, cum sex sexagenis curruum pro vino colligendo et recipiendo in Austriam equitaverunt et multa vasa vini, aliarum rerum receperunt, tandem in itinere et reversu gentes ducis Austrie et tunc eciam marchionis Moravie, qui habuit filiam regis Sigismundi predicti sibi in coniugem, et ibidem ipsius capitaneus dominus Kragierz, ut dicebatur, cum XVI milibus equitum et peditum Wiklefistas prope civitatem Waydhof conflictu invaserunt et contra se hinc inde hostiliter pugnaverunt, sic ultimo gentes ducis evicerunt et, ut dicebatur, citra quatuor milia Wiklefistarum interfecerunt et meliores et nobiliores septingentos captivaverunt et vinctos in Wiennam secum adduxerunt et omnes currus cum pixidibus et vino recepto et aliis rebus ipsis receperunt. Thomas vero et Nicolaus Sokol capitanei cum quibusdam paucis aditis equis et ascensis ad domos proprias revenerunt; qui Nicolaus Sokol tunc fortalicium Rzeczicze archiepiscopatus Pragensis et totum illum districtum per potenciam et adiutorio Wiklefistarum et vi tenuit et possedit.

Eodem anno post Assumcionem beate Marie virginis presbiter Procopius cum secta Wiklefistarum et alter presbiter Procopius Parvus. Procopko, cum secta Orphanorum et cum eis dominus Hanussius et filius domini Friderici de Kolowrat iam ipsis adherens se in Slesiam de districtu Plznensi diverterunt et ibi, qui erant circumvallati de secta eorum in civitate Nyemcz, salvos fecerunt, quia terrigene Slesie ante ipsos ad domilicia sine nocumento equitaverunt. Deinde se sic omnes ad Opaviam et deinde ad Ungariam ultra flumen Walih et prope civitatem dictam Nuitra et ibi in districtu illo in opidis et villis equorum. bovum et aliarum rerum magnam predam receperunt et nocumentum fecerunt; abinde presbiter Procopius Maior et dominus Hanussius de Kolowrat cum suo exercitu a Orfanis recesserunt ad Brodam Ungaricalem. Presbiter vero Procopius Minor et Czapko, tunc capitaneus Orfanorum, et filius domini Friderici de Kolowrat resedentis in Libstain et Johannes de Zdiar dictus Smikusky et Sigismundus Huler de Horzowicz cum civibus de Grecz regine et aliis civitatensibus et armigeris districtus illius cum secta et exercitu Orfanorum circa et prope civitatem Gilava in Ungaria remanserunt, ut communiter dicebatur, eorum ultra septem milia equitum et peditum cum trecentis et ultra curribus. Et sic congregati Ungari et Boemi quidam, servitores domini Sigismundi regis, et Moravi contra eos processerunt conflictu et novem diebus cum ipsis succesive conflictuantes, sic quod ultimo dicta secta et exercitus Orfanorum ante eos fugam dedit et in eadem fuga, ut dicebatur, CC et quinquaginta et ultra currus cum pixidibus et rebus diversis dimiserunt et, ut dicebatur, vix eorum duo milia redierunt et L vel circa currus. Alii vero, videlicet Sigismundus Horzowsky sunt per Ungaros captivati et per gentes regis interfecti et in fuga in dicto flumine submersi. Et hec duraverunt per totum autumpnum et usque festum et prope Nativitatis domini eorum illuc transitus et reditus et multi eorum Orfanorum sunt mortui frigore, quia tunc erat incipiendo a festo sancti Martini continuum et intensissimum frigus. Secta vero Orfanorum ad Nativitatis domini in modica quantitate revenerunt Pragam.

Deinde eodem anno circa festum s. Katherine exercitus presbiteri Procopii Maioris cum Thaborensibus et illis de Ostromecz, ut dicebatur, eorum equitum et peditum circa X milia se in Austriam diverterunt et quandam civitatem dictam Liczow invaserunt et in eodem districtu usque Circumcisionem domini et ultra nocumenta magna facientes continuaverunt.

Eodem anno residua pars Orfanorum cito post Nativitatem domini se ad bona domini Zbinconis Leporis de Hazmburg diverterunt prope Hazmburg, gentesque domini Sbinconis predicti eorum equites XL vel circa quosdam de dictis Orfanis invaserunt et eorum septem interfecerunt et XXV vel circa captivarunt, quos ad arbitrium domini Johannis Leporis de Budina liberos dimisit.

Anno domini MCCCCXXXII dominico post Dorothee fuit magnus concursus et convocacio Prage Wiklefistarum, Thaboriensium, Orfanorum, capitaneorum eorum, videlicet presbiteri Procopii Maioris et presbiteri Procopii Minoris, Czapconis, capitanei Orphanorum, et Otticonis, capitanei Taborensium. Et tunc semper yems magna et intensa continuabatur et sic concluserunt, quod se eorum maior pars in Slesiam diverterunt; et primo in Luzaciam equitaverunt et deinde in Slesiam et ibi hostiliter magnum nocumentum fecerunt.

Eodem anno prima et secunda septimanis in ieiunio erat ex nive continue quasi ningente magua inundacio aquarum per totam Boemiam et alibi, que non fuit tanta a XL et ultra annis. Que secte suprascripte Taborensium et Orfanonorum se in territorium Bramburk diverterunt et eodem ieiunio et usque civitatem Frangffurt et ultra magnum fecerunt nocumentum in dicto territorio et in Lusacie territorio, usque festum Stanislai primo in Bohemiam revenerunt.

Eodem anno et estate se ante civitatem Olomucz diverterunt et ibi magnum fecerunt nocumentum, deinde rescientes, Slezitas et Wratislavienses in civitate (Strzelin) terminum habere, ab Olomucz equites ante miserunt et cum curribus eos equites suos sexingentos sunt insecuti et ipsam civitatem per sturm lucraverant et captivos quingentos de Wratislavia et Slesia captivarunt, inter quos erant quatuor consules et Nespor armiger et ipsis CCC loricas receperunt; hec facta circa festum s. Jacobi; 15 et CCCC equos.

Fridericus de Kolowrat

Eodem anno etc. XXXII tunc in castro Carlsstain erat burgravius dominus Zdeslaus miles de Burzenizcz et gubernator castri erat frater ipsius Cunso de Burzenicz et capitaneus supra gentes predicti domini regis Sigismundi et supra gentes domini Zdeslai erat famosus armiger Rus de Hrziessihlaw, dominusque Fridericus Kolowrat de Libstain erat eorum, videlicet regalium et domini Zdeslai capitalis inimicus, nec cum ipsis treugas pacis quovismodo habere voluit. Contingitque, quod feria III eodem anno in octava Anuncciacionis beate Marie virginis dictus Fridericus in curru perrexit Pragam habens secum equites circa quinquaginta. Tandem predicte gentes de Carlstain, eorum equites LVI et peditum LX vel citra, contra ipsum processerunt et ipse Fridericus hoc presciens ad equum sedit et metquintus ad unam partem et quidam ipsius servitores, ut dicebatur, Johannes, Swamberk et Stiepanko vel Simonek, eorum quatuor, ad aliam partem supra montes evaserunt, aliique ipsius familiares, equites et pedites, se opposuerunt se defendere volentes et, cum equites de Carlstain in eos hostiliter irruerunt, ipsi fugam dederunt et in villam Chrustenicz mixtim cucurrerunt et ibi eorum aliquot dehastarunt, sic quod eorum duos interfecerunt et XLI captivarunt et triginta novem (equos) equites cum sellis receperunt et decem bonas loricas receperunt et XXIII balistas et currum panno rubeo contectum et quatuor equos in curru. Et sic cum dicta victima in Carlstain revenerunt, captivi vero erant principales Hugwicz, Stegar, Pinta, Ottik, Zbramyr, Slechta, Lantfrid et alii usque ad numerum predictum.

Eodem anno videlicet XXXII feria II ante s. Urbani sex diebus Fridericus de Libstain et Hanus (de) Colowrat, frater suus, patruelis Benessius Swinie et dominus de Petrzpurk congregati cum equestribus et peditibus, eorum trecenti et ultra, in villis Nowy Dwuor, Kramy, Ketczicze et aliis tribus villis pecudes et pecora abegerunt, qui villani et pauperes homines eos insecuti fuerunt et ipsi in silvis clam pedestres conservaverunt et, cum isti pauperes homines propter eorum bona et res ad eos venerunt, ipsi pedestres et equestres in eos irruerunt et eorum X et ultra occiderunt et multos graviter vulneraverunt et secum captivos ultra XXX adduxerunt. Doleat nunc omnipotens deus de tali abhominabili iniuria et in evum!

Eodem anno mortuus est dictus Fridericus Colowrat de Libstain in castro Libstain feria IV post Margarathe et reliquit quinquaginta et ultra captivos, villanos et alios, quos captivaverat minus iuste, in turbis et truncis graviter tentos. Oret pro anima sua, quis vult!

Eodem anno post festum Stanislai predicte secte Procopii presbiteri Maioris Taborensium et Minoris Procopii Orfanorum se in Slesiam diverterunt et deinde in Ungariam et sic circa festum sancti Johannis civitatem Trnawa lucraverunt hostiliter; successive ad annale forum, ac si mercatores essent, in civitatem venerunt et, cum eorum exercitus prope civitatem advenit, extunc isti, qui quasi mercatores diversi in civitatem Trnawa venerant, sencientes, suos complices iam circa civitatem in nocte esse, ad valvas concurrerunt et valvas duas effregerunt et suos in civitatem inmiserunt et ipsam civitatem obsederunt.

Eodem anno etc. videlicet XXXII circa festum sancti Johannis Viklefiste quidam de Moravia per tradimentum cuiusdam conversi dicti monasterii Hradistie prope Olomucz ipsum monasterium hostiliter lucraverunt.

Aqua magna, pons Pragensis rupta

Eodem anno etc. videlicet XXXII in estate, que estas fuit multum gravis, quia a festo sancti Georgii non pluit nisi semel satis modicum usque dominicam, que ceciderat in illam sillabam fus, et sabbato ante predictam dominicam hora quasi XXIIII cepit pluere et pluebat quottidie usque feria III ipso die Marie Magdalene. Et sic feria II in vigilia s. Magdalene in nocte et feria III ipso die fuit tanta inundacio aquarum, sic quod tantam veteres senes et decrepiti homines utriusque sexus non recordabantur, sic quod multas villas, opida, molendina, fenum, frumenta messa, acervos bladorum et feni aqua receperat et de diversis rivis, rivulis, fluminibus in tantum aqua fuit a gravi coartata, sic quod per nimiam obstruccionem lignorum, domorum, feni, bladorum quasi Pragensis pontis decursus aquarum fuit obstructus, sic quod quasi per totam civitatem Antiquam Pragensem, ymmo in platea communi circa mediastinum et per alios vicos et plateas grandis aqua fluebat et magnum dampnum in celariis, in pontibus diversis fecit et ultimo propter dictam obstruccionem pontis quatuor testudines et tres stube seu sustentacula pontis lapidei Pragensis et quinque testudines tunc sunt rupte et evulse; et sic illa aqua per pontem tenta rupto ponte per vehementem descensum suum recepit et destruxit omnia molendina in civitate Pragensi, que fluvium Multavia(m) adiacebant preter duo, que eciam satis destructa fuerunt, et sursum per aliquot miliaria, sic quod panis erat in civitate Pragensi multum in caro foro, quod prius erat pro duobus nummis, tunc erat vix pro uno grosso; et multi homines per Boemiam tunc per nimiam inundacionem diversarum aquarum sunt submersi, quia cum opidis, villis et domibus et integris molendinis homines et res et substanciam eorum aqua ex inproviso et vehementer recepit, sic quod multus fletus erat in Boemia, Misne, in Drazdan et alibi iuxta rivos et flumina. Tunc eciam secta Orphanorum eadem estate circumvallaverunt castrum Potstain et secundum Friczstain et tercium Peckam nono die post festum sancti Jacobi, castrum vero Freyczstain cito cum eis concordavit. Ista vero duo castra se defendebant usque festum s. Dorothee ad alium annum et demum concordaverunt.

Rex Sigismundus ad coronacionem

Eodem anno etc. videlicet XXXII serenissimus princeps et dominus, dominus Sigismundus, Romanorum, Ungarie, Boemie, Dalmacie, Croacie etc. rex, felicis recordacionnis Karoli, Romanorum imperatoris, filius, in vere se in Mediolanum transtulit, deinde eadem estate in civitatem Placenciam pervenit et ibi aliquot septimanis ex causis racionabilibus permansit et deinde in civitatem Parmam pervenit et iter faciendo versus Romam pro corona sacri imperii ultima laborando. Eodem anno proclamari consilium sacrum universale in civitate Basiliensi dicta Pazel suo et sancti patris Eugenii, tunc pape quarti, nominibus procuravit celebrandum ad universarum personarum spiritualium et secularium tocius christianitatis reformacionem.

Eodem anno et estate predictus dominus rex in festo Johannis Baptiste et circa in civitatem Lucam Tuskanie pervenit iter predictum faciendo et ante predictam civitatem contra Florentinos et in ipsorum gentibus quendam conflictum fecerunt et est lucratus, quod dictorum Florentinorum ad CCCC sunt captivati et nece prostrati. Deinde processit ad civitatem Senez; et gentes nonnulli regis Arragunie et ducis Mediolanensis et de Janua ipsum regem in dicto itinere fideliter adiuvabant et una cum eo iter faciebant versus Romam pro dyademate imperiali suscipiendo.

Predictum vero consilium Basiliense, cuius directores erant dominus Julianus, sacri pallacii apostolici et domini Eugenii pape legatus, et illustris princeps et dux Wilhelmus Bavarie, qui locum tunc regis Sigismundi tenuit, inceptum fuit anno predicto etc. videlicet XXXII circa Assumcionem beate Marie virginis, in quo erant archiepiscopus Mediolanensis, archiepiscopus de Anglia et quinque cardinales et magna congregacio archiepiscoporum, spiritualium, episcoporum, doctorum et principum secularium etc..

Eadem estate circa festum s. Venceslai marchio Misnensis cum suo marchionatu et Saxonum fecit treugas pacis cum Pragensibus, Taborensibus, Orfanis et eorum sectis ad duos annos, pro quo dedit eis IX milia flor.

Item duces Slesie et Slesite idem fecerunt et dederunt eis pro dictis treugis mille VIC sexagenas grossorum.

Eodem anno etc. videlicet XXXII in quatuor temporibus feria V ante sancti Venceslai dimissi sunt captivi hinc inde domini Hanussii, domini Friderici, iam mortui, et de bonis Slapi per arbitrium indicum per Pragenses, Taborienses et Orfanos constitutos.

Eodem anno feria II in vigilia sanctorum Simonis et Jude apostolorum Przibiko de Klenowy, qui tunc civitatem Mysam tenuit, Johannes Zmrzlik, Swoyssi de Zahradka, qui tunc Wilstain et Rokyczan tenebat, et gentes domini Menhardi de Nova domo, et de Harawicz, de Sicca, de Glatovia et de Domazlicz circumvallaverunt castrum Lopata, in quo ex senioribus erat Przibiko de Zasanicz, Liczko magnus et quidam dictus Slechta de Wilharticz, sed castrum Wilharticz tunc tenuit dominus Menhardus suprascriptus, castrum vero Lopata tunc tenuit Habardus dictus Lopata. Qui ipsum castrum defenderunt usque annum etc. XXXIII usque festum sancte Dorothee et diucius pre fame et siti in dicto castro se defendere non valentes ipsum castrum soli incenderunt et, quo quis potuit, transiverunt, isti vero ante castrum iacentes ipsum castrum rupserunt et destruxerunt.

Eodem anno etc. videlicet XXXII sabbato in festo sancti Nicolai dominus Wilhelmus Kostka, Benessius de Mokrowus, Pragenses magistri Rokycana et Englis et alii sacerdotes ex parte Pragensium et Taborensium et Orfanorum de Praga post Basiliam dictam Pazl ad consilium generale equitaverunt et cum eis dominus Zdeslaus Tluxa de Burzenicz, tum burgravius in Carlstain, racione salvi conductus eorum Wiklefistarum.

Item eodem anno videlicet XXXII ante Nativitatem domini inmediate fuit eciam magna aqua in fluminibus, sed non tanta, quanta erat prius.

Eodem anno etc. videlicet XXXII ante Nativitatem domini prope factum est conflictum inter quosdam Taborenses, quorum fuerunt ultra duo milia, et gentes ducis Austrie in Austria prope Znoymo, ubi dicebatur, quod ex utraque parte fuerunt ultra quingenti interfecti, sed plus Taborensium quam Australium; et receperunt Taborenses ultra ducentos equos equites dominis Kragierz et Puchomerz et Taborenses ipsis Australibus XI pixides seu bombardas dictas hufnicze. Et nocte adveniente Taborenses recesserunt, Australes vero eos insequebantur usque ad crastinum ad vesperas et non valuerunt eos investigare.

Anno domini MCCCCXXXIII a Circumcisione domini usque festum Valentini erant tanti nives communiter hominibus usque pudibunda et tantum frigus et gelua, sic quod pre figore homines in viis diversis moriebantur.

Eodem anno Pardus, capitaneus presbiteri Procopii et Taborensium in campis perseverancium, eorum equitum, ut dicebatur, septingenti et peditum VII vel VIII milia et currus CCC vel citra habentes se in Ungariam in territorium sive districtum dictum Spiss transtulerunt et ibi opida et villas solempnes circum Gremnicz expugnaverunt et magnam predam receperunt et ad festum Corporis Christi in Boemiam revenerunt.

Eodem anno in festo Stanislai et circa revenerunt suprascripti ambasiatores, qui in Basiliam ad consilium generale equitaverunt, et cum eis presbiter Procopius Rasus, qui eciam ad eundem consilium cum predictis ambasiatoribus equitaverat, revenerunt et cum ipsis ab eodem consilio Basiliensi solempnes ambasiatores, videlicet Magne Constancie et de Auspurk episcopi et quidam tercius solemnis auditor sacri palacii apostolici et dominus Egidius, magnus doctor Parisiensis, et dominus decanus Ratisponensis et alii ad hos tres doctores et consiliarii plurimorum principum ad Boemie et Moravie barones, milites, terrigenas, civitates et communitates; et ipsa septimana post festum sancti Viti fuit magna congregacio terrigenarum predictarum et magna audiencia Prage in collegio et disputaciones ex utraque parte supra quatuor articulis, pro quibus Boemi et Moravi instabant, per magistros et sacerdotes eorum ex una et dictos episcopos et doctores, ambasiatores sacri consilii Basiliensis, parte ex altera, ymmo et super aliis XXVIII articulis, in quibus dicti Boemi quidam et Moravi cum ipso consilio et episcopis et doctoribus suprascriptis discordabant, et sic ipse concursus et disputaciones a festo sancti Viti usque festum s. Procopii continuabatur, sed proch dolor nichil finaliter concluserunt, solum quod dicti Boemi et Moravi tres ex suis, videlicet magistrum Procopium de Plzna, dominum Martinum dictum Lupacz, presbiterum simplicem, et Mathiam dictum Lauda de Piska, cum dictis episcopis et ambasiatoribus ad consilium predictum feria VI ante Margarethe direxerunt.

Eodem anno in vigilia Sophie, ipso die feria V Ascensionis domini dominus rex Sigismundus supra et infrascriptus urbem Romanam equitavit, qui cum magna solempnitate per dominum Eugenium papam et per Romanos tamquam rex Romanorum est susceptus; sole tercio die Geminorum, luna vero in gauda Piscium.

Rex Sigismundus coronatur in imperium

Item eodem anno etc. videlicet XXXIII dominico ipso die sancti Spiritus, pridie ante festum sancti Urbani, in illa sillaba net, die 24 mensis Maii, quod tunc ipso die sol erat in signo Geminorum XIII die et luna in Leone, capite eius, videlicet primo die, invictissimus princeps et dominus, dominus Sigismundus, dei gracia Romanorum imperator semper Augustus ac Ungarie, Boemie, Dalmacie et Croacie etc. rex per sanctissimum in Christo patrem et dominum, dominum Eugenium quartum sacrosancte ac universalis ecclesie Romane militantis summum pontificem, cum magna sollempnitate missa prius per eundem dominum papam decantata, adhibitis ad hoc omnibus cerimoniis, que de iure vel consuetudine adhiberi debuerunt, diademate imperiali in ecclesia s. Petri ante altare sancti Mauricii in imperatorem Romanum et tocius Christianitatis dominum coronavit eundem per porreccionem et sumcionem dominici corporis ad bona spiritualia et temporalia exercenda confirmando, deindeque ipsi domini, papa et imperator, se concorditer et multum amicabiliter finem tractaverunt, quibus ambobus in regimine ipsorum erga eorum subdiciones altissimus det profectum nunc et in evum!

Eodem anno feria IV post s. Viti hora quasi vigesima prima sol ecclipsabatur per totale suum corpus. Et eadem septimana et post duas ebdomadas erant magne inundaciones aquarum, sic quod ipso tempore a festo Marie Magdalene usque festum sancte Margarethe de anno etc. videlicet XXXIII erant sexies inundaciones magne aquarum, que in bladis et segetibus et molendinis et pratis magnum nocumentum fecerunt, prout eciam superius continetur.

Item Sigismundus imperator post suam coronacionem inicium tale fecit suarum literarum: Sigismundus, dei gracia Romanorum imperator semper Augustus ac Ungarie, Boemie, Dalmacie, Croacie etc. rex, notum facimus etc., finem vero talem: datum Rome feria etc. regnorum nostrorum, anno Hungarie XLVII, Romanorum XXIII, Boemie XIII et imperii primo.

Czapko perrexit Poloniam

Eodem anno etc. XXXIII Czapko suprascriptus, capitaneus secte Orphanorum in campis continue perseverancium, una cum ipsa secta, ut dicebatur, septingentis vel citra equitum et VII vel VIIIM peditum et cum CCCL curribus tempore Maii se in Poloniam in adiutorium regi Polonie contra cruciferos Prutenos transtulerunt et precipue circa festum sancti Georgii, ibique quasi tota estate continuaverunt et magnum nocumentum Prutenis fecerunt una cum gentibus Gagalonis, regis Polonie, et reversi sunt in Boemiam circa festum sancti Galli cum qaudio et leticia, prout eciam inferius patebit.

De circumvallacione Plzne

Eodem anno etc. XXXIII presbiter Bedrzich et Pardus, capitanei secte presbiteri Procopii Rasi, ut dicebatur, VIIC vel citra equitum et VI vel VII milia peditum cum CCC vel citra curribus se ante civitatem Plznam in villa Skornavi feria III post festum sancte Margarethe hostiliter locaverunt et castra contra eandem civitatem metaverunt ipsam lucrare conantes et deinde circumvallaverunt ab utraque parte; et hoc erat in crastino festi sancte Margarethe, quia tunc erat festum sancte Margarethe feria II.

Eodem anno feria II in octava sancte Margarethe in illa sillaba fus obiit strenuus miles dominus Zdeslaus Tluxa de Burzenicz, Zdeslaus, burgravius in castro Carlstain, et sepultus est in ecclesia sancti Palmacii sub eodem castro in crastino solempniter.

Rzitka in Bavariam

Eodem anno etc. videlicet XXXIII illa septimana ante festum sancti Venceslai Pardus, capitaneus secte Taborensium ante Plznam iacencium et castra metancium, et Johannes Rzitka, tunc capitaneus in Domazlicz, ut communiter veridice dicebatur, cum quingentis et ultra equitibus et cum mille quadringentis peditibus se in Bavariam transtulerunt versus Cubam et magnam summam pecorum receperant et aliarum rerum. Tandem centum eos sunt insecuti cum peditibus equites et conflictum simul inierunt et ultimo Teutunici vicerunt, sic quod ex Boemis, ut communiter dicebatur, vix equitum XXX et peditum centum sunt reversi. Pardus vero et Johannes Rzitka ab ipsis fugierunt. Et Pardus reversus ante Plznam eadem septimana est a suis complicibus captus et vinctus et dominus et presbiter Procopius tunc a quodam ribaldo dicto Twaroh fuit ad caput cum sede seu scabello graviter vulneratus et captus, sed (post) paucos dies liberatus.

Eodem anno imperator Sigismundus in festo sancti Venceslai de Roma in Basiliam ad consilium venit.

Eodem anno et tempore ante et post festum sancti Venceslai apparuit per multos dies sero et nocte cometa cum gauda supra protensa versus occidentem, ut speratur, supra metas Francie et Anglie. Et modico post eodem anno erat pestilencia magna Prage et in Boemia.

Eodem anno feria II post sancti Wenceslai obiit dominus Johannes de Liten et ibidem in ecclesia sepultus est.

Eodem anno obiit domina Margaretha, contoralis Prziechonis Hrziczonis de Skrzipiel et soror germana B., sabbato ante Galli et sepulta in ecclesia in Przibram. Orate deum pro ea et omnipotens deus misereatur anime sue in eternum!

Revenit Czapko de Polonia

Eodem anno etc. XXXIII illa septimana, in qua erat festum Galli, revenit Czapko, capitaneus Orfanorum, una cum ipsis Orphanis de Polonia et de Prusia.

Revenerunt ambasiatores, dominus episcopus et alii, de Basilia

Eodem anno circa festum sancti Luce evangeliste dicti ambasiatores Magister Procopius de Plzna, presbiter Martinus dictus Lupacz et Mathias de Pieska de Basilia a consilio generali in Boemiam una cum episcopo Magne Constancie de limitibus Anglie et suprascripto domino auditore Johanne de Palomar et aliis doctoribus et magistris a dicto consilio destinatis revenerunt.

Item anno etc. XXXIII post Epiphaniam domini suprascripti, episcopus et auditor et cum ipsis Cunsso et Rus de Carlstain et dominus Martinus Lupacz sine omni fine de Praga in Basiliam ad dominum Sigismundum imperatorem et ad consilium reequitaverunt.

Eodem anno etc. XXXIII et tempore, quo ante Plznam iacuerunt in quinque campis seu locis circum Plznam dicte secte, suos per diversos districtus Boemie destinaverunt, qui multociens cum curribus multis exeuntes villanis et opidanis frumenta eorum tritulaverunt, pecudes et pecora et diversas hospitalitates vi receperunt et quedam ad sectas ipsas ante Plznam et quedam ad castra et ad propria domicilia deduxerunt, receperunt et abegerunt et nocumentum mirabile per plures districtus Boemie fecerunt.

Item anno etc. XXXIV gentes imperatoris Sigismundi et cum ipsis Przibiko reversus ad imperatorem de Klenowy dederunt super Plznam, ut dicebatur, VIIC mensuras frumentorum equites, hostibus Wiklefistis ibidem iacentibus, et hoc feria III Pasce in illa sillaba trice.

Eodem anno circa Ascensionem domini, videlicet dominico ante Philippi et Jacobi apostolorum, nix magna bene ad unum passum et in crastino feria II per multas provincias supernivit.

Eodem anno post Philippi et Jacobi apostolorum feria IV ante Ascensionem domini predictus Przibiko cum gentibus imperatoris predicti, videlicet Zdenkone dicto Drstka, tunc tenentis Tyn Horssowiensem, et Hrdonio de Dubnan, tunc tenentis castrum Radynie, et Zbinkone de Koczowi, tunc tenentis castrum Necztiny, et domini de Swamberg et Busko Czalta, tunc tenens castrum Rabstain, dederunt frumenta et necessitates diversas super Plznam, Taborensibus et Orfanorum secta et Pragensibus de Maiori et Nova civitatibus circumiacentibus, ut dicebatur, ad septingentos strichones.

Domini intraverunt Minorem civitatem Pragensem

Eodem anno etc. XXXIV feria V ipso die Ascensionis domini nobiles domini dominus Menhardus de Nova domo, dominus Hincze dictus Ptaczek de Purstain de Lipi, residens in Ratay et in Polna, dominus Petrus de Janowicz, residens in Chlumecz, dominus Wilhelmus Kostka de Postupicz cum aliis terrigenis Boemie habentes XII milia vel circa equitum et peditum pro bono pacis ante Pragam venerunt, deinde Minorem civitatem Pragensem intraverunt. Et cives Maioris civitatis Pragensis ad eos exiverunt et concordiam ad sedandum disturbia in regno Boemie fecerunt, ut ipsis hoc idem iuvarent et pacem disponerent. Et isti omnes simul ad cives Nove civitatis Pragensis destinaverunt, ut ipsis intranquillitates et disturbia in regno Boemie mitigare et sedare ac pacem disponere iuvarent contra sectas Taborensium, Orphanorum et aliorum eorum complicum continue in campis degencium et multa nocumenta in regno faciencium. Qui cives Nove civitatis Pragensis pro eo, quia (habebant) secum in civitate tunc presbiterum Procopium, presbiterum Ambrosium, Andream dictum Kersky, tunc capitaneum Taborensium, et Nicolaum de Paderow, secundum capitaneum eorundem, proterve et superbe responderunt nolentes hoc idem facere, sed quia dictis sectis volunt adherere. Et sic cives Maioris civitatis ipsos statim diffidarunt et mox intromissis dominis ad suam civitatem cum gentibus eorum per pontem in Novam civitatem potenter et hostiliter irruerunt et se invicem crudeliter percusserunt, sic tamen, quod domini et gentes ipsorum et populus Maioris civitatis Novocivitatenses vicerunt et quosdam interfecerunt; et quidam cum dictis Procopio presbitero et prescriptis, quo quis scivit, de civitate Nova fugierunt, reliquos vero captivaverunt et multa bona de dicta civitate in Maiorem civitatem et gentes dominorum predictorum receperunt et exduxerunt. In crastino vero feria VI hora quasi sexta predicti domini barones cum ipsorum gentibus de civitate predicta ad campos exiverunt, prius tamen dictam Novam civitatem civitati Maiori ad obedienciam deducentes. Hec enim facta sunt in illa sillaba Jo han sta nis.

Anno eodem etc. videlicet XXXIV sabbato ipso die sancti Stanislai predicte secte Taborensium et Orfanorum auditis, que facta sunt de civitate Pragensi, cum ipsorum complicibus, videlicet Zatensibus, Veronensibus et aliis quartis civitatum, que ad circumvallacionem Plznensem expediverant, concrematis castris, sepis, domibus, que circummetaverant, et in eisdem multos infirmos et vulneratos similiter, qui cum ipsis ibidem iacuerunt, concremaverunt et deinde ipso mane cum magna confusione recesserunt versus Hostomnicz et deinde ad Przibram et deinde versus Tabor. In predicta vero circumvallacione Plzne erant nobiles domini dominus Wilhelmus de Rizmberk, alias de Sswihow, dominus Pertolt de Rizmberk, residens in Dolan, Hrdko dictus de Kutta de Duban, Lwiko de Rowny, iudex vero tunc Plznensis erat Venceslaus Ditlikonis, consules Johanko et quidam dictus Naroznik, Koranda; predictique domini et alii homines militaris status, cum ipsis iudex, consules et cives defenderunt se viriliter et audacter XLIII septimanis continue minus tribus diebus.

Eodem anno feria III post Stanislai fuit infirmus magister Johannes Rokyczana, predicator ecclesie sancte Marie ante Letam curiam Pragensem et plebanus intrusus et magnus Wiklefista, qui in consilio Basiliensi predicto ipsum articulum comunionis sub utraque specie corporis dominici populo seculari affirmabat, defendebat et in probacionem stabat per scripturas, que pro intencione sua probanda allegare sibi videbantur.

Circumvallacio Borotin

Eodem die Taborenses de civitate Tabor fortalicium domini Nicolai de Borotin Borotin circumvallaverunt, deinde mox non lucrato recesserunt.

Eodem anno videlicet XXXIV feria III ipso die sancti Urbani gentes dominorum Ulrici de Rosenberg, Johannis de Rabie et domini Menhart de Nova domo, tunc cum ipso Prage equitante, ante Pragam erant et dominus Johannes de Swamberk, Zdenko Drstka, dominus Alsso de Zyeberk et de districtu Plznensi habentes sexingentos equites et decem milia vel circa peditum in adiutorium Antique civitatis Pragensis et dominis Menhardo et Ptaczkoni suprascriptis et domino Alssoni de Sternberk contra Taborenses et Orfanorum sectam venerunt.

Tachlowicze

Et ipso die dominus Johannes de Sswamberk et predicti Drstka, Plznenses et de Rabie Bohuslaus burgravius fortalicium Tachlowicze hostiliter lucraverunt a quodam Oldra de Zhudowicz, qui se eciam metXI dedit in captivitatem et non fuit ausus se defendere, et deinde in crastino prope Zabiehlicz in adiutorium dominis Menhardo, Ptaczkoni, domino Alssoni de Sternberk et Pragensibus contra Taborenses et Orfanos venerunt.

Conflictum magnum

Eodem anno videlicet MCCCCXXXIV dominico, die solis, ipso die sancti Crispini, in illa sillaba cris pan, die XXX mensis Maii hora vesperarum vel quasi, indiccione duodecima, tercio kalendas Junii, sedecimo gradu solis, et tunc C erat litera dominicalis, pontificatus sanctissimi in Cristo patris et domini, domini Eugenii pape quarto anno, ipsius imperii vero serenissimi principis et domini, domini Sigismundi, dei gracia imperatoris Romanorum semper Augusti ac Ungarie, Boemie, Dalmacie, Croacie etc. regis, anno secundo, inter civitates Kurzym et Brodam Boemicalem prope villam. Et ipso die sol erat in signo Geminorum et luna in gauda sive fine Piscium.

Nobiles barones et domini dominus Menhardus de Nova domo, dominus Ptaczko de Lipii alias de Ratay et de Polna, dominus Alsso de Sternberk alias de Holicz, domini Czenkonis fiilius de Wesele alias de Wartmberk, dominus Herant de Cunstat iuvenis residens in Podiebrad, ex parte vero domini Ulrici de Roznberk dominus Nicolaus miles dictus Krchlebecz, Chwal de Chmelny, capitanei ipsius, Janko Prziedborii cum gentibus dicti domini Ulrici de Rosennberg, ut dicebatur, CC vel citra equites et VIII milia peditum, et dominus Johannes de Swamberg, magnificus dominus Alsso de Zeberg, dominus Borsso, licet pedestris et pauper, de Ossyek, Zdenko de Drstka, Protiwa de Sweyssin, Hadko de Pabgenicz, Burian et Johannes fratres de Bugstain, diversi armigeri de districtu Plznensi et aliqui cives de Plzna, Bohuslaus, burgravius domini Johannis de Rabie, Venceslaus Warleich de Frimburg, Humprecht de Koczow et gentes domini Venceslai de Michalowicz residentis in Strakonicz, cruciferi, Venceslaus Struch, purgravius de Wlharticz domini Menhardi predicti, Dionisius dictus Borzek, Petrus Zmrzlik de Sweyssin residens in Orlik, Benessius de Myslin prope Mirowicz, Wilhelmus de Jaroslawicz, subburgravius Karlstain castri cum sociis de dicto castro, videlicet Mathia dicto, Stephano dicto Stietina, Venceslao de Skrhlow, Leonardo, famulo Bartosskonis de Drahonicz, Mathia nigro, Mauricio, Pechone et duobus hastonibus et aliis pluribus abinde equestribus et peditibus; ac eciam cives nonnulli de omnibus civitatibus Pragensibus et cives de Mielnik; predicti domini barones et milites et cives et clientes habentes omnes simul, ut communiter dicebatur, mille equites et decem milia peditum vel citra et duodecim vel citra sexagenas curruum cum defendiculis ipsorum et pixidibus; et Czernyn, dominus Petrus de Chlumecz, dominus Benessius de Duba residens in Kozlo, Jakubko de Bozegiow, burgravius domine Perchte vidue de Conopist cum dicte domine gentibus ex una parte; et presbiter Procopius Rasus, tunc capitaneus secte Taborensium, cum ipsis Taborensibus campestribus, et Johannes dictus Czapko de Ssan, tunc supremus capitaneus secte Zizkonis Orfanorum similiter in campis a XII annis continuancium et bellancium, et presbiter Prokopko dictus Parvus Procopius et Andreas dictus Kersky, capitaneus eciam Taborensium de Thabor, civibus de ibidem et civibus de Werona, Slana, Zacz, Luna, Kurzim, Kolin, Montis Cutnis, Broda Boemicalis, Czaslaw, Nymburg, Grecz regine, Jaromirz, Trutnow, Dwuor, Altamuta, Glatovia, Prachaticz, Domazlicz, Piesek, Litomierzicz, Rohacz de Duba, Zagimacz de Giwissovicz cum aliis ipsorum complicibus, ut communiter dicebatur, VIIC equites et novem milia vel citra (peditum),... curruum, XL et plus pixides dictas hufnicze cum aliis pixidibus et ipsorum defendiculis parte ex altera conflictum intraverunt. Et predicti barones domini fingentes se quasi ab ipsis fugere et a gauda curruum ipsorum optimas gentes domini Ulrici de Roznberg predicti, de districtibus Plznensi, Prachinensi, domini Menhardi et de Carlstain in gauda et tergo curruum ipsorum cum vexillo domini de Roznberk clam et secrete, quod hastas et balistas apprehensas ad terram declinantes, ordinaverunt et verso quasi tergo et gauda curruum ipsorum ab ipsis hostibus Taborensibus et Orfanis etc. quasi recedere et fugere conantes. Tandem ipsi hostes ipsos cum curribus suis ad gaudam curruum dominorum insequebantur de pixidibus acriter sagittantes et clamantes: fugiunt, fugiunt et fugam dant! et appropinquati ad currus dominorum cum ipsorum curribus quasi per medium stadium vel citra de curribus ipsorum hostiliter exiverunt in currus dominorum irruere volentes. Tandem gentes dominorum et domini erecto velo sive vexillo domini Roznberk et alio extra suos currus contra ipsos iam prope existentes exierunt et viriliter cum ipsis pugnaverunt et ipsos sic audacter et acriter percusserunt, quod sicut diceret Miserere mei deus, illum psalmum, Taborenses et Orfani fugam et tergum dederunt et in suos currus reverti volebant, ut ipsos circum se clauderent, sicque predicti domini et gentes cum ipsis ita celeriter et agiliter ipsos percucientes insequebantur, quod cum ipsis in eorum currus incurrerunt et ibi in eisdem curribus dictos presbiteros ambos Procopios predictos et plures presbiteros de eorum secta maligna interfecerunt et ipsorum multos in curribus et de curribus fugientes et ipsos insequentes, pedestres et equestres, interfecerunt et occiderunt et Gyram Ussati et Marssonem Krsnak subcapitaneos captivaverunt. Et sic communiter dicebatur (ab hiis), qui ibidem tunc erant, quia predicte secte decem milia cum 2 C habuerunt, et soli hoc idem dicebant, et vix eorum IIIC fugierunt; hos omnes in loco et incursu versus Brodam Boemicalem et prope Brodam interfecerunt et cremaverunt et omnes currus, pixides, arma et defendicula ipsis receperunt; dictus vero Czapko et Andreas Kersky, capitanei predicti, in Coloniam fugierunt equites cum eorum paucis complicibus peditibus. Et domini et gentes suprascripti ipsos in crastino usque Coloniam sunt insecuti et ibidem quadam concordia interveniente, videlicet ut idem Czapko et Kersky et Colonienses cum ipsis adherentibus sint Prage in termino seu concursu magno omnium dominorum, civitatum et terrigenarum et, qui(d)cunque ibi in festo sancti Johannis Baptiste dictatum et conclusum fuerit per dominos terrigenas et civitates, in illis debent stare et contentari, et sic predicti domini et terrigene campum distraxerunt et ad domicilia redierunt proclamato termino Prage in festo sancti Johannis Baptiste. Dominus vero Alsso de Sternberk cum domino Johanne de Sswamberg et suprascriptis de districtu Plznensi et Wilhelmo de Jaroslawicz, subpurgravio castri Carlstain, cum ipsorum exercitu equitum, peditum et curruum se in districtum Slanense diverterunt et ante fortalicium Rzysuty castra metaverunt et lucrare illud conabantur hostiliter, tandem hoc idem per unum diem et unam noctem exequi non valentes extunc feria IV in illa sillaba pri mi, die nona mensis Junii, in octava sancti Marcelli ad sua domicilia revertebantur. Tandem Jakubko de Moravia, qui tunc castrum et civitatem Bielina violenter aquisita tenuit et possedit et qui tunc cum Zatensibus, Lunensibus, Slanensibus ante castrum Kostomlati in districtu Zatensi castra metaverant ipsum hostiliter lucrare cupientes, quod castrum tunc tenuit dominus Sigismundus de War(t)mberg, residens in Dieczin, predictos dominum Alssonem cum ipsorum exercitu Plznensium etc. hostiliter cum ducentibus quinquaginta vel circa equitibus et tribus milibus cum quingentis peditum de predictis civitatibus et districtibus fuit usque prope villam Rzewniczow insecutus cum curribus, pixidibus et aliis defendiculis, cumque prefati domini et Plznenses et subpurgravius de Carlstain in silvam prope Rzewniczow cum ipsorum exercitu et curribus pervenerunt, tandem predictus Jakubko cum suis equitibus et peditibus ipsos in silvam insequendo et ipsis visis et quasi ipsos pro fugitivis habendo magnum cum suo exercitu clamorem fecit, qui domini suprascripti et de districtu Plznensium conversi cum suis equitibus et quibusdam peditibus, curribus postpositis, in ipsum Jakubkonem et suos complices hostiliter et viriliter irruerunt, ipseque dorsum cum suis dedit et usque ad suos currus bene e converso ad XV stadia fugit cum suis equitibus et peditibus, sed predicti domini et Plznenses sibi equites et pedites bene, ut a veredicis tunc presentibus dicebatur, centum et quinquaginta et ultra sunt interfecti, tantum loco et in fuga, quod si cito ad currus non fugissent, multos ex ipsis interfecissent. Tandem predicti domini ad propria et ipse Jakubko cum residuo suo exercitu ante ipsum castrum Kostomlat reversi sunt et domini ex suo exercitu quendam dictum Mladie de Wylemow et quendam dictum Chmelniczky et plures alios captivaverunt et secum ad propria abduxerunt preter ipsum Mladie qui, quod sit captivus, negavit et suo iuramento se iustificavit.

Equitaverunt Ratispanam ad dominum imperatorem

Item eodem anno etc. videlicet XXXIV ipsa septimana infra octavas sancti Johannis Baptiste fuit magnus concursus baronum, dominorum, terrigenarum Prage, ubi eciam pars domini imperatoris suprascripti affuit, videlicet dominus Ulricus de Rosennberg, dominus Puota de Czastolowicz, dominus Sbinco Zagiecz, dominus Arnostus Wlassymsky et alii quam plures servitores domini imperatoris, ubi conclusum est ex parte Wiklefistarum, ut ad dominum imperatorem equitarent dominus Menhardus de Nova domo, dominus Ptaczko de Ratay et dominus Czenko iuvenis de Wartmberg, militares vero Benessius de Mokrowus, Czapko de Ssan, capitaneus Orfanorum, dominus Wilhelmus Kostka, Smirzicky, civiles vero Johannes dictus Welwar; feria III ipso die sancti Laurencii suprascripti et dominus cum ipsis Wilhelmus Kostka, Johannes de Smirzicz, magister Johannes de Rokyczan et dominus Martinus Lupacz et magister Marcus ad dominum imperatorem Ratispanam transiverunt equites.

Eodem anno etc. XXXIV feria III post festum sancti Jacobi erat inundacio aquarum maxima in flumine Mzye sub castro Carlstain, maior tribus ulnis quam priores, videlicet que erat in vigilia sancte Marie Magdalene ante duos annos.

Bedrzich captus per Hoym

Eodem anno videlicet XXXIV circa festum Assuncionis sancte Marie presbiter Bedrzich cum centum octuaginta equitibus est a quibusdam dictis Hoym in Slesia in castro Fallemberg per invitacionem, ac si alicubi vellet civitatem invadere, captivatus.

Eodem anno etc. videlicet XXXIV ipso die sancti Augustini nobilis Burian de Gutstain cum aliquibus de districtu Plznensi pecudes ante Veronam abegerunt et tunc cives eos insequebantur Veronenses et sic predicti Plznenses cum Burian conversi in ipsos irruerunt et sex ipsorum interfecerunt et LXVI captivaverunt et secum in Rabstain et ad alia castra adduxerunt.

Eodem anno circa festum sancti Venceslai reversi sunt predicti domini Menhardus, Ptaczko, Czenko etc. a domino imperatore de Ratispana et ipsa septimana post festum sancti Galli concursum et terminum magnum super responsione domini imperatoris facienda Wiklefiste habuerunt. Et tunc Prage ibidem mortuus est dominus Henricus, domini Czenkonis filius, et ductus est per suos de Praga mortuus.

Item Nativitatis domini anno infrascripto erat die dominico et erat B litera dominicalis.

Imperator Sigismundus

Anno domini MCCCCXXXV post Circumcisionem domini dominus Sigismundus imperator de Ratispana per Danubium infra fretavit seu navigavit in Prespurk.

Ostromecz

Eodem anno ipso die sancte Gedrudis, quod erat feria V, nobilis dominus dictus Ptaczko de Lipii, residens in Ratay, cum domino Benessio de Duba, residente in Kozle, cum famoso Jakubkone de Bozegiow, purgravio domine Perchte vidue de Konopist, et cum ipsius gentibus et strenuus miles dominus Nicolaus in Zwiekow cum gentibus domini Ulrici de Rosennberg circumvallaverunt Philippum capitaneum cum suis complicibus in Ostromecz et feria II post Georgii venerunt et circumvallantes nobiles domini Alsso de Sternberk, alias de Holicz, qui tunc castrum Hradek tenuit, et dominus Jenczo de Petrsspurk cum quinquaginta equitibus, undecim curribus et ducentis peditibus.

Item dominico ipso die sancte Sophie venit ad eos dominus Hanussius Kolowrat cum centum XXV equitibus et trecentis peditibus.

Eodem anno, videlicet XXXV circa festum sanctorum Philippi et Jacobi apostolorum Divisius Borzek, tunc purgravius ex parte civium Maioris civitatis Pragensis in castro Pragensi, et cives civitatis eiusdem et dominus Janko miles de Russynow, qui tunc castrum Lichtmburg tenuit, circumvallaverunt Coloniam Boemicalem, in qua erant adhuc quidam de secta presbiteri Procopii et alterius presbiteri Procopkonis interfectorum et Zizkonis olim.

Eodem anno dominico ante Urbani Philippus de Ostromecz cum suis complicibus dedit dictum castrum dominis suprascriptis et cum suis equitavit in civitatem Tabor supra Usk Luznicz.

Lomnicze lucrata

Item eodem anno etc. videlicet XXXV circa Annuncciacionem beate Marie virginis nobilis dominus Ulricus de Rosennberg fortalicium dictum Lomnicze cum suis et civibus de Budweis circumvallavit, in quo fortalicio quidam Johannes dictus Carnifex erat tunc capitaneus, quod per vim cum Taboritis olim aquisiverant, cum quo Johanne, ut dicebatur, in dicta obsidione erant de civitate Tabor et Taboritarum ultra centum, et ibidem per tria quartalia anni in eadem obsidione continuavit et postea ipsis quingentas sexagenas dedit et ipsi sibi fortalicium condescenderunt.

Imperator venit Moraviam

Eodem anno imperator Sigismundus de Ungaria circa festum sancti Procopii venit in Moraviam in civitatem Brunam, ad quem ibidem venerunt nobiles domini dominus Menhardus de Nova domo, dominus Alsso de Sternberk, dominus Hyncze dictus Ptaczko de Purstain, Divisius Porzek de Miletinek, tunc ex parte civium Pragensium purgravius Pragensis, dominus Hanussius de Kolowrat, Johannes dictus Smirzicky tunc tenens castra Bezdiezi, Helfmburg, Rudnicz, Huskam. Jakubko de Moravia tunc tenens Bielinam, Kostomlati, Kysperk, Engspurk castra, Zluticze. Usk super Albea et Teplice civitates et cum eis multi milites et terrigene Boemi et Pragenses cum pluribus civitatibus, cives tam de Moravia quam de Boemia, ubi eciam fuit dux Austrie, tunc eciam marchio Moravie, suprascriptas ad tractandum de unione et pace Boemie et Moravie et Slesie terrarum.

Item eodem anno etc. videlicet XXXV circa festum sancti Procopii interfectus est famosus Przibiko dictus Koczka de Skal, tunc in Zwiekow morans, in via per Thaboritas non remote a civitate Piesek.

Et ipsa septimana ante hoc submersus est metquintus famosus Jacobus dictus Kyselicze; transfretavit in navi sub Zwiekow per Multaviam, cum quibus navis ex inproviso perversa est et ipsi sic sunt submersi.

Eodem anno feria V in vigilia Divisionis apostolorum hora vesperorum vel quasi fuit ventus validus et magnus forte media hora, qualis non fuit a triginta annis, qui multum nocumentum fecit in castris domibus tectum rumpendo et edificia diversa et in quibusdam districtibus in Boemia et presertim prope Knyn grando blada percussit et magnum nocumentum fecit.

Magnus concursus Prage

Eodem anno etc. videlicet XXXV feria VI ipso die sanctarum Undecim milia virginum fuit magnus concursus baronum, videlicet dominus Menhardus de Nova domo, dominus Hyncze dictus Ptaczek de Piergstain alias de Polna, dominus Aless de Sternberg dictus Holiczky, dominus Petrus de Zwierzeticz, dominus Herart de Cunstat, dominus Hanussius de Colowrat et famosi armigeri dominus Wilhelmus miles dictus Kostka de Postupicz, Divisius de Colowrat, Johannes de Smirzicz, Johannes de Russynow et quam plures alii barones, armigeri, clientes, cives et civitates de Boemia in civitate Pragensi congregati, qui tunc multis tractatibus prehabitis concluserunt de pace regni et consenserunt in dominum regni Boemie sub certis condicionibus et articulis, qui ipsis pro bono regni utiles esse videbantur, videlicet in dominum, dominum Sigismundum, Romanorum imperatorem et Ungarie regem suprascriptum, qui tunc in Ungaria in Novograd curia morabatur, et illuc ad eum predicti barones, armigeri et cives Pragenses equitaverunt post tres septimanas; tunc ibidem eciam magistrum Johannem in archiepiscopum Pragensem proclamaverunt.

Imperator venit in Gihlaw

Item anno domini MCCCCXXXVI feria III ante festum sancti Viti, die duodecima Junii potentissimus princeps et dominus, dominus Sigismundus, Romanorum imperator etc. venit de Ungaria in Giglaviam in metas Moravie, baronesque Boemie, milites, terrigene et potentes civitatum suprascripti quasi omnes ad ipsum ipsa septimana ibidem venerunt et pro bono pacis et unionis simul diligenter tractabant. Tandem feria quinta in crastino festi sancti Procopii, die quinta Julii predicti barones, milites, terrigene et cives corone Boemie ipsum dominum Sigismundum imperatorem suprascriptum unanimiter et concorditer in regem Boemie erexerunt, condicionemque Magister Johannes Rokyczana de consensu legatorum a sede apostolica et sacro consilio, quod tunc in civitate Pazl continuabatur, et domini imperatoris predicti ac baronum, militum, terrigenarum et civitatum potestatum de communione sub utraque specie in ecclesia pronunciavit in hunc modum: Quod quicunque personarum secularium postularet sive sub una sive sub utraque specie corpus dominicum communicare, ut eidem iuxta suam postulacionem preberetur, uni alios vi non coercendo nec diffamando. Item nota, quod anno domini MCCCCXXXVI erat annus bisextilis et erat A et G litere dominicales et Nativitatis domini erat feria tercia.

Eodem anno etc. videlicet XXXVI feria sexta ipso die sancte Margarethe erant circum castrum Carlstain fulgura et tonitrua magna et in rivulis ex utraque parte castri magna inundacio aquarum, quod ab una parte rotam molendini cum tota gasa recepit, ab alia vero parte castri ex impetu domunculam seu gasam probi hominis Johannis dicti Hrzebenarz, nunccii communis, subvertit aqua et domunculam cum ipsius tribus pueris iuvenibus recepit et submersit, inter quos unus puer cum cunabulo est receptus et submersus, et ipse cum conthorali sua vix exnatavit; et tunc sol erat in fine Cancri et luna similiter in fine Cancri.

Et tunc adhuc imperator Sigismundus cum baronibus, militibus, terrigenis et civitatum potestatibus suprascriptis erat in Iglavia et erant ipso anno tonitrua magna, qua non fuerunt a multis annis. Ipso anno feria VI et sabbato ante Assuncionem beate Marie virginis cives Pragenses cum aliis quibusdam civitatibus et terrigenis pro domino impertore supradicto pro eo adducendo in Boemiam et deinde Pragam equitaverunt.

Imperator venit Pragam

Anno eodem feria quinta in vigilia sancti Bartholomei dominus Sigismundus imperator hora meridiei vel quasi cum magna solempnitate venit Pragam una cum domina, domina Barbara, conthorali sua, Ungarie etc. regina, nondum tamen ad imperium et Boemie reginam coronata, ubi per barones, milites, terrigenas, cives Pragenses et alios cives plurium civitatum tanquam dominus et rex Boemie est assumptus et sibi claves de civitate et castro ante portam per magistros civium et cives sunt presentate et ipse eas viceversa eisdem commisit. Et ibidem est pax proclamata et concursus communis tocius regni celebrandus mox tempore sequenti; et ipso die luna erat in Aquario et sol in Virgine, die ipsius signi VI, quod factum erat die XXIII mensis Augusti presentibus duce Stetinensi et comite de Czil et baronibus Boemie domino Menhardo de Nova domo, Alssone de Sternberg alias de Holicz, domino Hynczone de Pirstein dicto Ptaczek alias de Polna, domino Sbincone de Hazmburg, domino Petro de Zwierzeticz, domino Girzikone de Wysmburg, Divissio Borzek de Miletinek, tunc purgravio Pragensi, domino Wilhelmo milite dicto Kostka de Postupicz et aliis multis principibus, comitibus, baronibus, militibus, Ungarie, Boemie, Slesie, Moravie terrarum terrigenis, de quorum titulis non constat ad presens.

Nota quod suprascriptus dominus Sigismundus imperator in magestatus suo sigillo sic se scripsit: Sigismundus imperator, dei gracia Romanorum semper Augustus ac Ungarie, Boemie, Dalmacie, Croacie, Rame, Servie, Gallicie, Lodomerie, Commie, Bulgarie rex et Lucemburgensis heres. In alia vero parte erat sculpta aquila cum duobus capitibus et circum quodlibet caput erat dyadema insignitum, circum quam aquilam erant litere circumferenciales tales: Aquila Ezechielis, missa sponse de celis, volat avis sine meta, quod nec vates nec propheta evolavit alcius.

Eodem anno feria V post Martini dominus Wilhelmus Kostka tunc tenens bona Litomysl versus Grecz regine hostiliter cum multis gentibus equitibus et peditibus processit et prope civitatem predictam in quadam villa per unum miliare a civitate iacuit. Qui de civitate exeuntes manu armata in ipsos iacentes irruerunt et ibi dominum Wilhelmum predictum in lecto et cum ipso, ut dicebatur, centum interfecerunt et trecentos captivaverunt et currus, pixides, equos et arma receperunt et ad civitatem deduxerunt.

Barbara imperatrix coronata est

Item anno domini MCCCCXXXVII feria II in carnisprivio, die XI mensis Februarii, infra missarum solempnia serenissima princeps et domina, domina Barbara, comitis filia Czilicii dicti de Czil et suprascripti domini Sigismundi imperatoris legitima contoralis, in castro Pragensi in ecclesia cathedrali sancti Viti in summo per reverendum in Cristo patrem et dominum dominum N., de Magna Constancia episcopum, in reginam Boemie de consensu baronum, militum, terrigenarum et Pragensium ac aliarum civitatum ex voluntate est solempniter, servatis omnibus iuribus et consuetudinibus ad hoc condignis, Boemicali corona est coronata presentibus domino imperatore suprascripto, duce Stetinensi, domino Ulrico de Rosennberg, Menhardo de Nova domo, Crussina de Cumburg, Petro de Michalowicz, Sbincone de Hazmburg, Johanne de Usk, Henrico de Straz, Alssone de Sternberg alias de Holicz, Hinczone dicto Ptaczek de Pirstain alias de Ratay, Arnosto de Wlassim et aliis pluribus baronibus, militibus, terrigenis et civitatum communitatibus; et tunc sol erat in Piscibus gradu primo et luna in prima parte Thauri.

Eodem anno etc. videlicet XXXVII in quatuor temporibus ieiunii suprascriptus dominus imperator una cum baronibus domino Nicolao de Hazmburg residente in Cost, supremo iudice, domino Alssone de Sternberg alias de Holicz, camerario supremo, domino Alssone de Rysmburg, notario supremo, domino Ulrico de Rozmberg, domino Menhardo de Nova domo, purgravio castri Pragensis, domino Alberto de Coldicz residente in Bielina, iudice curie, domino Sbincone de Hazmburk, domino Nicolao de Laynstain residente in Borotin, domino Hincone de Czerwena Hora, domino Petro de Zwierzeticz residente in Tchorzowicz, domino Hinczone de Pirgstain dicto Ptaczek, tunc magistro monete; et strenuo milite domino Zawissio dicto Hrzicz de Gymlin et famosis Alssone dicto Hurt et Hrzicz de Swynarzow, Johanne de Wolstain et dicto Wilhelmo Chrt; et sic duodecim barones et octo armigeri: primo iudicio presedit in castro Pragensi in magna stuba ab hora 3arum usque ad vesperas et aliis diebus bene per unum mensem iudicio presiderunt et ibi multa iura edixerunt et proclamaverunt. Et inter cetera predicto domino imperatori ad unum integrum censum sancti Georgii per totum regnum sibi dandum, videlicet medietatem in medio quadragesime et aliam medietatem in medio quadragesime et aliam medietatem in festo sancti Laurenti consenserunt et proclamaverunt.

Eodem anno in festo sancti Georgii domina Ewka, relicta domini Zdeslai Tluxe de Burzenicz, tradita est in uxorem legitimam domino Henrico dicto Zagimacz de Gewissovicz, qui tunc tenuit et possedit monasterium sancti Procopii, et ibidem cum rebus suis eidem deducta est.

Eodem anno in festo et circa festum sanctorum Philippi et Jacobi apostolorum Rohacz de Duba cum suis complicibus in monte dicto Syon, quem ipse Rohacz sic appelavit et ibidem castrum novum edificavit, est per dominum Hinczonem de Pirstain, residentem in Ratay et Polna, tunc magistrum curie et monete domini imperatoris predicti, cum gentibus domini imperatoris et civibus Pragensibus circumvallatus et eodem anno feria II ante Nativitatis beate Virginis per sturm vinctus et captus, lucratus et cum eo Wysko, miles de Polonia, et Martinus presbiter residens.

Eodem anno in quatuor temporibus ante festum sancti Trinitatis et per continuos quatuordecim dies dominus imperator et domini barones et armigeri suprascripti in castro Pragensi secundario presiderunt iudicio et multas edicciones et iura inter terrigenas Boemie edixerunt et sentenciaverunt ac concluserunt.

Eodem anno etc. videlicet XXXVII post festum sancti Johannis Baptiste dominus Sigismundus imperator suprascriptus de civitate Pragensi in Egram equitavit ad tractandum cum marchione Misnensi et duce Johanne Bavarie, ut restituerent castra et civitates, que ad coronam Boemie pertinent, et post quinque septimanas Pragam revenit.

Item eodem anno feria IV post Margarethe obiit famosus armiger Mikess de Lidicz, residens in Kozolup, purgravius in Carlstain, mortuus est et sepultus in ecclesia santi Palmacii.

Eodem die venit solempnis ambasiator Ungarorum Pragam veridice referens, quod gentes Ungarorum, Boemorum, Moravie et Polonie per plura congregati multos Turcos et paganos bello in campo bene XL milia et ultra vicerunt, inter quos Ungaros quidam Pangracz erat capitaneus, et circa Assumcionem beate Marie virginis quatuor duces dictorum paganorum gentes Ungarorum domino imperatori Pragam adduxerunt vinctos.

Rohacz

Anno etc. XXXVII dominico ipso die Nativitatis beate Marie virginis cum Viscone, milite de Polonia, et presbitero Martino dicto Prostrzedek et quodam dicto Zeleny, optimo sagittario de pixidibus, et cum purgravio suo de monte Syon cum aliis XLVI captivis Pragam per gentes domini imperatoris aportatus est et statim ad pretorium ad tormenta ductus est et tormentisati sunt acriter et in cratino feria secunda ipse Rohacz in cathena et cingulo deauratis et alii in cathenis rubeis et quinque ipsorum in rubea veste in numero LIII sunt suspensi, quia prius erant septem captivi eius, videlicet Gindrzissek, Baba, Hrdinka, Zidek et alii ipsorum complices.

Anno etc. XXXVII ipsa septimana ante festum sancti Martini quidam dictus Pardus, olim capitaneus secte Orfanorum, habens CCC et ultra equites et nescitur quot pedites civitatem dictam Litewl in Moravia hostiliter invaserunt et erant iam quasi potentes. Sed quidam cives ad quandam turrim ascenderunt et demum Olomucenses supervenerunt et per scalas in civitatem intraverunt ipso die et ibi CCXCIII equos equites receperunt et multos interfecerunt et bene eorum centum quinquaginta vel citra captivaverunt, ex quibus tercio die viginti suspenderunt, Pardusque metXXus evasit et in crastino sub castro dicto est cum suis omnibus complicibus captivatus et ipsis equos, arma, argentum, vestes, currus Olomucenses receperunt Captivi erant Geniconis filius ... dominico in vigilia Martini die X Novembris.

Eodem anno dominico ante s. Martini mane suprascriptus dominus imperator de Praga in Znoymo cum magno comitatu venit et cum domina Barbara, Ungarie et Boemie regina equitavit et cum eis comes Cilicie habens bene mille equites et currus ultra centum et pedites aliquot centena.

Sigismundus imperator obiit

Item eodem anno, videlicet MCCCCXXXVII feria II hora XXIII suprascriptus dominus Sigismundus imperator in eadem civitate Znoymo in crastino festi Concepcionis beate Marie virginis per infirmitatem pollicis in pede causa principali in domino de hoc seculo migravit; dominus omnipotens misereatur anime sue nunc et in evum; pontificatus sanctissimi in Cristo patris et domini domini Eugenii pape quarti anno etc., indiccione etc., die IX Decembris. Et ductus in Ungariam et in Novograd sepultus est.

De rege Adalberto

Item anno domini MCCCCXXVIII post predictum imperatorem Sigismundum, regem Ungarie, Boemie etc., illustrissimus princeps et dominus, dominus Albertus, dux Austrie, qui nobilissimam dominam, dominam Elizabeth, filiam domini imperatoris, est in regem Ungarie electus et in Ungaria in loco solito et consueto servatis servandis cum magna solempnitate coronatus est. Et eodem anno in vere eciam per electores sacri imperii est electus in regem Romanorum.

Eodem eciam anno dominico post Ascensionem domini et ipsa septimana venit in Iglaviam et ibi per barones Boemie, videlicet dominum Ulricum de Rosennberg, dominum Menhardum et dominum Johannem de Nova domo, dictum dominum Crussinam de Swamberg, dominum Johannem de Ryzmberk alias de Skala, dominum Henricum de Straze et alias terrigenas, videlicet Buriano de Guttstain, Sbincone de Coczow et dictis Leskowecz, Malowecz, Rabstain, dominum Henricum de Plawno et cives Pragenses, Gurinienses, Montis cutnis et aliarum plurium civitatum et baronum et terrigenarum est in regem Boemie electus et feria sexta in crastino Corporis Christi, quod erat feria VI ante festum sancti Viti, die XIII Junii, hora vesperorum cum magna solempnitate in civitatem Pragensem pro domino est adductus et assumptus.

Eodem anno dominico ipso die sanctorum Petri et Pauli apostolorum, die prima Julii, hora tercia dictus dominus Albertus in ecclesia et capella sancti Viti est in regem Boemie coronatus, circa quam coronacionem coronam ante eum sub celo ducto portaverunt domini dominus Ulricus de Rosennberg, dominus Menhardus de Nova domo, supremus purgravius Pragensis, dominus Nicolaus dictus Zagiecz de Hazmburg alias de Kost, supremus iudex regni Boemie, et dominus Hanussius de Kolowrat alias de Krassuow, hii quatuor quilibet partem suam tenens coronam portaverunt, dominus vero Venceslaus de Michalowicz, tunc ordinis cruciferorum sancti Johannis Jerosolimitani per Boemiam etc. prior generalis, sceptrum, dictusque Crussina de Kumburg gladium, vero dominus Johannes de Ryzmberk alias de Rabie pomum aureum cum cruce ante dictum dominum regem deferebant, ante et post coronacionem, presentibus domino Sigismundo de Dieczin, Johanne domino Crussina, domino Henrico de Watmberg, dominis Johanne et Ulrico de Nova domo, domino Petro de Abrspach, de Swamberg, dominis Wilhelmo et Alberto de Perstain, domino Henrico de Straze, domino Nicolao de Borotin et aliis pluribus dominis et baronibus, magistro civium et consulibus et Maioris et Nove ac Minoris civitatum Pragensium; episcopusque Olomucensis ipsum coronavit sede archiepiscopali tunc vacante, presentibus dominis Constacie Magne et Luthomislensis episcopis et multis aliis prelatis etc., dominis, civibus regni Boemie et Cilicie ac Sannberg comitibus et domino de Wolse et quam pluribus dominis de Austria et Ungaria.

Et statim forte decimo die post predictam coronacionem quidam Poloni, de Ostrorog et Johannes, palatini de Poznonia et alter de Dunaw, ut dicebatur, cum quinque milibus equitum cum presbitero Bedrzichone, qui tunc civitatem Coloniam tenuit, et cum Johanne Czapcone suprascriptis et Johanne de Russinow et Benessio de Mokrowus et aliis Boemis, eorum complicibus, et precipue cum adiutorio civitatum regine et domini Hinczonis de Pirstain alias de Ratay dicti Ptaczek in Boemiam venerunt et magnum nocumentum per rapturam et ignem fecerunt in diversis districtibus regni Boemie et contra regem predictum.

Eodem anno etc. XXXVIII dominico post Vincula sancti Petri, die tercia Augusti predictus dominus rex quasi cum omnibus comitibus, baronis, dominis, militibus, terrigenis, civibus et eorum potestatibus suprascriptis de civitate Pragensi contra dictos Polonos et Boemos, eorum complices, in campos versus Rziczan exivit, cui marchio Misnensis cum duobus milibus equitum et tribus milibus peditum et dominus Johannes, dux Bavarie, ut communiter dicebatur, cum mille equitibus et peditibus in adiutorium venerunt et dictos Polonos insecuti sunt usque ante civitatem Tabor et feria IV inmediate sequenti, die VI Augusti contra dictam civitatem et Polonos castra metaverunt. Et feria III ante Assumcionem gentes domini regis ipsis Polonis et Thaborensibus currus receperunt et concremaverunt et multos interfecerunt.

Eodem anno post Vincula sancti Petri, die IV Augusti dominus Alsso de Sternberg, residens in Hradek, diffidavit per literam domino Menhardo et suis et Petrus, filius suus, cum suis similiter diffidavit.

Eodem anno sabbato in vigilia Mathei ewangeliste dominus Albertus rex una cum marchione Misnensi et Pragensibus a Tabor Pragam revenit. Et post hoc statim marchio Misnensis cum suo comitatu et exercitu versus Misnam equitavit et perrexit et dominus Petrus, domini Alssonis filius, de Sternberg alias de Holicz, tunc castrum Hradek tenentes, de dicto castro cum ducentis vel citra equitibus et cum civibus Zatensibus et Lunensibus, ut dicebatur, eorum equitum et in curribus peditum quatuor milibus cum eorum complicibus dictum marchionem et suum exercitum hostiliter insecuti, qui tunc in Lowossicz nocturnabat, et in crastino, feria III, sancti Mauricii insecuti sunt eum ardenter et fortiter. Qui in dicta insecucione conversus conflictum inivit et, ut dicebatur, cum quingentis mille interfecit et similiter, ut dicebatur, mille quatuor centena et ultra captivos secum in Misnam abduxit. Hec facta sunt inter Pontem et Bielinam prope villam Zelenicze.

Eodem anno et estate predictus rex Albertus in Wratislaviam equitavit ad tractandum inter ipsum et regem Polonie de concordia et non est effectum consecuta, cuius iter fuit de Praga feria III ante Adalberti.

Item anno domini MCCCCXXXIX Turcones et pagani circumvallaverunt castrum ducis Disputi dictum Strziebrnik prope metas Ungarie. Rex vero suprascriptus de Wratislavia in Ungariam equitavit et ibi congregatis exercitibus Ungarorum tantum contra dictos Turcos processit cupiens ipsum castrum liberare, sed ob quandam aquam non valuit, sic quod ipsum castrum est per Turcos lucratum et aquisitum, predictusque rex reversus est in Ungariam et deinde volebat equitare Austriam et deinde in Boemiam, sed de Budin veniens in Longdorff septem miliaria a Budin super infirmitate dicta czerwena nemocz aliquot septimanis prius decumbens circa octavam sancti Galli diem suum clausit extremum, cuius anima requiescat in sancta pace, quia fuit bonus, licet Theutunicus, audax et misericors!

Eodem anno post festum sancti Martini in crastino cepit yemps grandis, qualis non fuit a XXX annis, et quasi continue duraverunt gelua magna, nives et frigora usque festum sancti Ambrosii et citra.

Eodem anno fuit concursus magnus dominorum, baronum, militum, armigerorum, terrigenarum et civitatum in civitate Pragensi circa festum Purificacionis et duravit per quatuor septimanas propter quasdam dissensiones Magistri Johannis Rokyczana et aliorum sacerdotum, sed ultimo pulcremodo omnes se invicem conposuerunt.

Item anno domini MCCCCXL circa festum sancti Johannis et post fuit magnus concursus Prage dominorum, baronum, terrigenarum et civitatum et spiritualium de eligendo rege Boemie, ubi ex se duodecim dominos, octo milites et armigeros elegerunt et quosdam de civitatibus et Magistrum Johannem Rokyczan pro eligendo rege.

Eodem anno feria VI post festum sancti Jacobi fuit magna tradicio de civitate Pragensi facta, sic quod, ut veridice dicebatur, Benessius de Mokrowus, Colda, Sweyczer, Ssoff cum quibusdam presbiteri Bedrzichonis, qui tunc Coloniam tenebat, cum ipsorum conplicibus habentes pacta cum quibusdam de Antiqua et Nova civitatibus Pragensis quandam mrzize, que erat prope valvam dicta Porziczka supra fossam, per quam ductus aque per murum Nove civitatis erat, efregerunt et Novam civitatem pertransierunt eorum bene, ut dicebatur, trecenti vel citra et usque ad portam Antique civitatis proximam curie regali pervenerunt et ibi clamaverunt super portulanum, ut aperiret, quia pisces ducunt super forum, cito, ne morerentur; portulanus vero, quia tunc infirmabatur, direxit uxorem, ut ipsis aperiret, uxor vero descendens seram deseravit, sed cathena nondum deposita per foramen respexit et vidit multos armatos cum lanceis stare, balistis et aliis defendiculis et continuo viceversa seravit et supra virum clamavit et vir supra cives et, quando clamor invaluit, isti metu per idem foramen recesserunt, quia plures eorum complices equites et pedites ante murum Nove civitatis Pragensis habuerunt. Quidam vero Ambrosius, civis Antique civitatis de domo a alba campana fugam dedit, qui in via captus, et secundus de domo a albo urso contra collegium eciam in civitate captus post multa martirii tormenta tanquam proditores abiudicati et demum post aliquot dies quilibet ante domum suam est salva gracia capite truncatus.

Eodum anno etc. videlicet XL quidam Mathias dictus Smolarz et Ondrassko frenifex, cives Antique civitatis Pragensis, feria III in vigilia octave sancti Venceslai, ut per precones clamatum erat, propter tradicionem et conspiracionem suprascriptis ante mediastinum Antique civitatis Pragensis hora meridiei vel quasi capitibus sunt truncati.

Eodem anno sabbato post festum sancti Francisci dominus Ulricus, filius domini Menhardi de Nova domo, de mandato patris sui Sigismundum Bolochowecz, nuper burgravium in Carlstain, captivaverunt et in castro ad captivitatem imposuerunt. Et eodem die dominus Ulricus in Novam domum de Carlstain equitavit, tunc Jacobo de Rzietka purgravio in Carlstain manente; et dimissus post quindecim septimanas.

Item anno domini MCCCCXLI in quatuor temporibus ieiunii fuit magnus concursus principum, baronum, militum, terrigenarum et civitatum Prage ad tractandum de rege futuro.

Et eodem anno feria V in vigilia Annuncciacionis beate Marie virginis fuit ventus validus a medio noctis usque eadem vigilia per totam diem, sic quod in districtu circum Carlstain multas domos, horrea et structuras subvertit.

Eodem anno feria VI in crastino sancti Viti et corporis Cristi opidum sive Budi post missarum solempnia a quodam sutore ibidem commorante sub Carlstain sunt totaliter concremate, sic quod tantum una domus remansit inferius sub castro; et tunc dominus Menhardus fuit Wienne aput reginam, Alberti regis relictam.

Anno domini etc. XLI circa festum Pasce Turcorum magna multitudo venerunt potenter in Ungariam ad confinium Septem castrorum volentes ibidem obsidere. Et terrigene et Ungari congregati in eos irruerunt et eorum circa XV milia interfecerunt et alii fugierunt; sic domino Menhardo de illis partibus scribebatur pro certo.

Eodem anno feria quarta ante Johannis dominus Menhardus et Jakubko miles Wiennam ad reginam Elizabeth de Praga equitaverunt.

Illis eciam temporibus illustrissimus princeps et dominus, dominus dux Austrie super coronacionem ad regnum imperii in Aquisgranum equitavit.

Eciam ipso anno infra festum sancti Procopii et festum sancte Margarethe erant quasi nebule et fumi, quales prius nunquam homines recolebant, sic quod sol mane et de vespere quasi sanguineus apparebat in Boemia, et continuavit per decem dies.

Eodem anno erat tempore veris et estatis magna siccitas, qualis non fuit a multis annis, quia non pluebat a festo sancti Georgii usque festum sancti Johannis, et propter siccitatem multa frumenta, videlicet ordeum, pisum. avena, fenum exigua et pauca fuerunt.

Regina Elizabet mortua

Item anno domini MCCCCXLII in vigilia Nativitatis domini in Ungaria in Rab mortua est nobilissima princeps et domina, domina Elizabeth, filia domini Sigismundi imperatoris et coniunx domini Alberti, Romanorum, Ungarie, Boemie etc. regis suprascriptorum, que reliquit duas filias et Ladislaum filium circa tres annos habentem, merito Ungarie et Boemie regem et heredem legittimum.

Eodem anno cepit magnum frigus esse circa festum Omnium sanctorum et nives magni et gelua erant et continuaverunt usque annum etc. XLIII. Et tunc erat defectus magnus in feno et avena et vie erant male propter nimiam magnitudinem nivis.

Item anno etc. XLIII circa Nativitatis beatissime Marie virginis mortuus est Jacobus famosus de Rzitka, purgravius castri Carlstain.

Eodem anno circa festum sancti Venceslai domini barones et civitates equitaverunt Wiennam ad regem Romanorum pro rege Boemie tractando.

[ADDENDUM]

Item anno domini MCCCCXLIV feria VI ipso die sancti Stanislai captivatus est rex Venceslaus Boemie in Verona per dominum Jodocum, marchionem Moravie, et dominos terrestres et ductus in castrum Pragense et deinde in Austriam et dimissus per amicabiles tractatus.

Anno MCCCLXXXXVII feria II Penthecosten domini interfecti sunt in Carlstain.

Anno MCCCCI circa festum sancti Jacobi Jodocus, marchio Moravie, et marchiones Misnenses et Wolframus, archiepiscopus Pragensis, et barones Boemie iacuerunt ante Pragam contra dominum Venceslaum, Boemie regem, post festum sancti Jacobi inmediate.

Item anno domini MCCCLXXXXIX circa Johannis captus tunc dominus Venceslaus, rex Boemie, per Sigismundum, regem Ungarie, fratrem suum germanum, et in Wiennam deportatus.

Anno domini MCCCCLI fundamentum factum est nove turris in Nova civitate sabbato ante dominicam Domine ne longe.

Anno domini MCCCCLXIIII factum est fundamentum nove turris in Parva parte penes domum Sasky in loco, ubi erat domus Cunssonis sutoris, feria V ipso die ante Urbani; et hoc fuit feria V ante festum sancte Trinitatis.

Anno domini MCCCCL erat iubileus annus Romanorum.

Eodem anno feria VI post festum sancti Egidii dominus Georgius de Podiebrad equitavit Misnam cum magno exercitu equitum et peditum et cum multitudine currus et magnum dampnum fecerunt et concremaverunt totam terram et feria V ante festum Galli lucraverunt civitatem dictam Kerowi et ibi magnam predam receperunt. Et concordia facta cum principe Misnensi reversi sunt Pragam cum magna preda feria III ante Omnium sanctorum.

Eodem anno in festo s. Katherine fuit concursus magnus Prage

Anno MCCCCLII combustum est Bethleem una pars feria III in die sancti Jacobi apostoli maioris.

Anno domini MCCCCLIII decolatus est Venceslaus dictus Durssmid feria II in vigilia sanctorum Philippi et Jacobi apostolorum.

Eodem anno feria VI ante Nativitatem beate Marie virginis decolatus est dominus Johannes de Smirzicz.

Eodem anno MCCCCLIII feria IV ante Simonis et Jude venit rex Ladislaus Pragam hora XXI. Et coronatus est in regem Boemie dominico die in die sanctorum Simonis et Jude anno supra et fuit in sua etate XIV annorum. Sigismundus habuit 2 annum.

Item anno domini MCCCCLVII rex Ladislaus venit Pragam in die sancti Michaelis et fuit feria V. Idem rex Ladislaus mortuus est in die Clementis hora XXIII. Et sepultus est in castro Pragensi feria VI in die sancte Katherine virginis cum magna solempnitate eodem anno ut supra.

Item pan Hanuss naiprwe przi mnie B. dobyl miesteczka Przibramie dobrze oplankowaneho a mnoho obile, sladuow a sspize pobral leta MCCCCXXI, w vtery przed weliku noczi.

Anno etc. XXII feria III post palmarum dominus Hanussius expugnavit Przibram secunda vice, ubi Chlewczonem Slamydum, Stiepankonem de Mislin captivavit et XLII equos equites receperunt et ultra viginti captivos receperunt.

Item ipse dominus Hanussius Przibram tercio expugnavit, quando eciam et fortalicium infra duas septimanas lucratus est.

Item dominus Hanussius quarta vice Przibram expugnavit, quando Parcifal, Venceslaus, Bohuslawconis amicus, et Surowecz eidem sunt ibidem interfecti.

Item anno etc. XXII in festo sancti Laurencii dominus Hanussius aquisivit per disturbium Hradek castrum, ubi Absolonem Bielobozkam Hrzicz, Johannem, Friderici filium, de Walcz cum aliis quinquaginta captivavit.

Item eodem anno cito post hoc Zibrzid, frater Absolonis, ipsum castrum Hradek obsedit et dominus Hanussius mox equitavit ad ipsum circumvallandum et, cum ipse Zibrzid eos vidit equitantes, de castro predicto per aliam partem fugit super Rakownik.

Item ipse dominus Hanussius cum dicto Alssone de Sternberg civitatem Rakownik per disturbium aquisiverant et civitatem excremaverunt, sed ecclesiam lucrare non val(u)erunt.

Item ipse dominus Hanussius cum gentibus dicti domini Alssonis, quando dictus Zibrzid de castro Hradek fugit in civitatem Rakownik, tunc fuerunt eum insecuti in Rakownik et ipse ante ipsos fugit ulterius in Zacz et ipsi domini cum ipsorum gentibus ipsam civitatem Rakownik et ecclesiam sicut fortalicium bonam expugnaverunt.

Item dominus Hanussius civitatem Brzeznicz bene lignis et sepis munitam cum domino Wilhelmo de Sswihow expugnantes excremaverunt.

Item anno etc. XXIV dominus Hanussius gentes Zmrzlikonis, videlicet Absolonem, Kowarziconem cum XVIII equitibus et CCC vel citra peditibus prope villam Hlubossie in campis per conflictum evicit, ubi XVI militares et centum XV cives de Przibram et laicos cum ipsorum defendiculis captivavit, reliqui vero in silvas fugierunt

Item gentes sue et cum ipsis B. et gentes domini Alssonis predicti, quando ante Carlstain iacuerunt, dominum Johannem Srssen militem, Stanislaum Poray, Johannem Koczowsky cum aliis XII Polonis prope ecclesiam Borek in campis per conflictum captivaverunt.

Item gentes domini Hanussii, videlicet Bohuslawko, B., et alios XXIIII Polonos captivaverunt, quando Janconem Przedborii et Parcifal in obsidionem in castrum Carlstain conduxerunt, et ipsis XXII balistas receperunt; et alii fugierunt.

Item fuerunt circa disturbium cum domino Hanussio in districtu Slanensi circa fortalicium, quod vix non lucratum; item circa Taklowicz circa sturm.

Item anno etc. XXI de castro Pragensi in Stodokl ecclesiam expugnavimus inimicis ibi fugitivis, et ibidem XVI captivos militares cum equis captivaverunt cum dominis Alberto de Bieskowicz, domino Sswabone.

Item vectores cum XII curribus et gentibus inter ipsos Pragam ducentibus eorum bene quinquaginta evicimus, equos ultra XXX recepimus in vado in Minori civitate Pragensi.

Item dominum Fridericum Kolowrat de Libstain in campo convicimus, ubi quadraginta captivos militares cepimus et XLII equos equites recepimus prope villam Chrustenicz.

Item dominus Hanussius predictus cum aliis expugnavit suburbium in Glatovia satis bonum et firmum.

Item bis in Plznam venit cum suis gentibus contra Zizkam ipsos defendendo et eum usque Kralowicz insequendo.

Item semel in Misam venit cum gentibus suis et ipsos ab inimicis ipsorum, qui ante Cutstain iacuerunt et deinde ante Misam, repulit. Et tunc eciam Tyn liberavit ab eisdem cum aliis.

Anno Domini MCCCCIV suspensus est Zul infra octavam Procopii.

Anno domini MCCCCXI in festo sancti Wenceslai mortuus est dominus Zbinco de Hazmburg, archiepiscopus Pragensis, in civitate Prespurg et sepultus est in castro Pragensi.

Anno MCCCCIX in festo Pasce feria III mortua est domina Prziba. Dominus misereatur sui!

Anno Domini MCCCCX die XV Julii commissum est grande bellum inter regem Polonie et Cruciferos Prutenos et rex vicit bellum et, ut a veridicis dicebatur tunc presentibus, quod in eodem bello magister Cruciferorum et sexcenti Cruciferi et sex milia militum clientum et ipsis in servicio existencium gentes regis interfecerunt; et ultimo in castrum Mawburg fugierunt rege, duce Witoldo eos sequente et rege Tartarorum.

Item anno Domini MCCCCXX in vigilia Purificacionis Marie obiit domina Anna, relicta Johannis de Drahinicz, mater Barthosconis, sepulta in Skrzipel in ecclesia ante magnum altare. Deus omnipotens misereatur anime sue et perducat in vitam eternam. Amen.